Shillong, Naitung 07
Ka jingshah tuh jong ki arshaka bad ka jingshah prong tuh jong ki dukan ka dang ïai bteng na kawei ka sngi sha kawei pat. Kane ka la pynsyier bad wanrah ruh ïa ka jingbym shngaiñ ha ki trai jong ki kali, ki dukan ne ki ïing.
Katkum ka khubor na ki pulit la ong ba u Jensing Ch Marak u la ai ka jingujor ba ha ka 2 tarik mynta u bnai, hapdeng ka por 10.15 mynstep haduh 2 baje mynsngi, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML08-F-0813 na phyllaw jong ka Tura Civil Hospital ha West Garo Hills.
Ha kawei pat ka khubor shah tuh, u Md. Moinuddin u la ai ka jingujor ba ha ka miet jong ka 2 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-M-4843 na phyllaw jong ka Mathura ha Jhalupara, Shillong.
Ha kawei pat ka jingjia, u Dr. SW Momin u la ai ka jingujor ba ha ka 3 tarik mynta u bnai, ha ka por kumba 3.15 mynstep, ki nongshong shnong ka Mission Compound, Tura ha West Garo Hills ki la ïoh ban kem ïa u Dhiru M Sangma (60 snem), katba u dang pyrshang ban tuh ïa u bateri na kawei ka kali kaba don ïa u registration number ML01-A-0060.
Ha kawei pat ka khubor, u Sayed Hussain u la ai ka jingujor tang da ka ktien ha thanat Hallidayganj ha West Garo Hills ba ha ka miet jong ka 2 tarik mynta u bnai, ki runar bym lah ban ithuh, ki la prong tuh hapoh ka dukan ka jong u, kaba don ha Panbari, Bollongre ha West Garo Hills bad ban tuh ïa ki tiar ki tar shna ïing kum ki bathroom fittings, tiles, sinks, bad kiwei-kiwei na ka kudam jong ka dukan.
