Washington, Naitung:
Katkum ki khubor, la ong palat 2,145 ngut ki heh jong ka tnat National Aeronautics & Space Administration (NASA) jong ka US kin shah weng kam noh namar ka jinghiar ka ioh- ka kot bad ka jinglong-jingman ha katei ka tnat, naduh ba ka US ka la pynbna ba kan sangeh noh ia ka jingai jingkyrshan bad ka jingmang tyngka sha katei ka tnat.
Bun na kitei ki nongtrei kiba mih ki dei ha ki kyrdan GS-13 haduh GS-15, ki kyrdan sorkar kiba ha khlieh duh, la ong ka kaiphod bad la ong ruh ba ka tnat ka la tyrwa ia ki nongtrei ban shongthait kloi noh.
“Ka NASA ka dang ïaineh ha ka thong jong ngi katba ngi dang trei hapoh ka mang tyngka kaba kham buh hakhmat eh”, la ong ka nongaiktien jong ka tnat, ka Bethany Stevens, ha ka khubor ba la phah da ka email.
Hapoh ka jingsynshar jong u President Donald Trump, ha kine ki bnai ba la dep, ka tnat haw- haw jong ka U.S. bad ki nongtrei jong ka NASA kiba don 18,000 ngut ki la mad ia ka jingeh kaba khraw na ka jingthmu ban weng kam noh ia ki bad hapdeng ka jingpyrshang ban pynduna ïa ka mang tyngka kaba lah ban pynsangeh noh ïa ki phew tylli ki projek jong ka tnat pule bniah shaphang ki kam haw-haw.
U nongmihkhmat jong u Trump ban long u nongialam jong ka NASA, uba long ruh u paralok jong u Elon Musk bad jong u heh spah Jared Isaacman, la i-kumba dei ma u, u nongpynmih daw ha ka jingiakynad hapdeng u Musk bad u President ka US- u Donald Trump, ha kaba u Musk u la shah weng noh na ka iing White House.
