New Jersey, Nailar:
Uwei u dohkha ‘whale’ uba don kumba 20 phut ka jingjrong, u la mynsaw jur bad iap noh hadien ka jing-iatyngkhuh bad kawei ka liengrit, ha kaba katei ka lieng ka la jan kylla khongpong syndon bad uwei uba shong ha ka, u la sied shapoh um. Hadien kata, la iohi ia utei u dohkha uba heh, uba la per lyngkar ha sla jong katei ka um.
Kane ka la jia hapoh Barnegat Bay, ha ka por kumba 2:45 jong ka janmiet Sngi Saitjaiñ, ha kaba katei ka lieng ‘Motorboat’ ka la kum iatyngkhuh bad utei u dohkha mar pyrshah ha ka por ba ka dang sum stet bha.
Ia kane ka jingjia la lah ruh ban sakhi lyngba kawei ka video kaba la ioh ring dur da uwei pat uba don lang ha katei ka lieng, ha kaba la iohi ia utei uwei uba shong ha ka, uba la sied sha um ha ka por ba katei ka lieng ka iatyngkhuh eh bha bad utei u dohkha heh. Watla katta, la ong ba ka long kaba don bok ba utei uba hap ha um, watla u la ia ksaid shitom ban poi sha ryngkew da kaba snoh ia ka lieng tad haduh ban da ioh ban tan biang ia u sha ryngkew, ym shym la don pat kino kino ki jingshitom ne jingktah ia ka jinglong- jingman jong ka met ne ka jingkoit- jingkhiah jong u.
Ka Marine Mammal Stranding Centre mynta ka la maham ïa ki nongñiah lieng ba kin long kiba husiar bha ha katei ka jaka bad ban pynneh ïa ka jingjngai kaba shngaiñ ym duna ïa ka 150 phut na ka jaka ba ki iohi ia kino- kino ki jait dohkha heh kiba don ha katei ka um.
