Kane ka rukom ai jait shim jait ha ngi ki Khasi – Pnar ka long kaba neh shiliang. Kumta ha ki jingiohi jong nga ïa kane ka rukom ai jait sha ka kmie ka long thik kum ka jingleh donbor ban ym ai lad ïa ka jingkwah jong kiwei.
Kum ka jingïaid jong ka por la dei ban ai lad ha ka mon laitluid ïa ngi ki khun kynthei bad shynrang ban shim ïa ka jait ka kmie ne ïa ka jait u kpa, ym ban shu sdin ha suiñ khlem da bishar ïa ka jingshisha. Namar mynta ki por ka la dei ka rukom synshar paidbah ym ka synshar donbor kum ha ki por myn barim. Lada ai lad ïa ka mon laitluid te ka jaitbynriew ruh kam don ka jingïa kynad kumba ka long mynta hapdeng kito kiba kwah ban ai jait noh sha u kpa bad kito kiba kwah pynneh pynsah ïa ka ai jait sha ka kmie.
Ka la dei ka por ban ïa ioh mar biang ha ka rukom ai jait shim jait ruh. Lada leh kumne kan wanrah ka jingïatylli ïa ka jaitbynriew Khasi – pnar jong ngi na baroh ki liang. Ka District Council kaba dei peit ïa ka Riti ka dustur ka dei ban wanrah ki aiñ na ka bynta ka jingbha lang ïa baroh, ym ban khang lad ne pyrkhing ïa ka mon jong nga jong phi.
Dei ban shah kylluid ïa kane khlem da mushlia na ka liang ki seng kur bad ki kmie ki kpa ruh. Ka jaitbynriew jong ngi ki ong, ka dei ka jaitbynriew tip briew tip Blei kumno pat kane kam ïalam sha ka tip ksuid tip khrei ha ka jaitbynriew. Dei ban shim kano kano ka lynti kaba pynhun ïa baroh.
C. B. Iawphniaw
