France, Naiwieng:
Uwei u briew 35 snem ka rta, ha ka Sngi Balang mu la leit rat naphang ia ki nongiaid kjat bad ia ki nongñiah ‘cycle’ ha kawei na ki dew lynnong jong ka France hapoh Oleron, ha kaba 10 ngut ki la mynsaw, kynthup ia 4 ngut kiba la mynsaw jur bha.
La ong ba utei u nongshong shnong ka Oleron, u la thmu ban pynmynsaw khnang ia ki katto- katne ngut ki nongleit- nongwan bad ki nongñiah cycle ha shilynter ka surok-bah ha ka ïew ba itynnad hajan ka nongbah La Rochelle, kaba don sha ka phang Sepngi, ong u nongmudui, u Arnaud Laraize.
Hynrei kaba sngew lyngngoh, ka long ba, haba la kem ia u, u la pyrta ia ki kyntien “U Blei u long U ba khraw tam” ha ka ktien Arabic bad la ong ba kine ki kyntien ki dei kiba ju pyndonkam da ki lehnoh Islamist.
Ki pulit ki la kem ia utei u briew bad ki dang tohkit ia u halor ka jingkynnoh ba u “thmu ban pyniap”, hynrei ka jingthmu jong utei u briew kam shym la paw shai mardor, la bynrap biang u Laraize.
Ka tyllong khubor hadien ka jingbud-dien ia katei ka mukotduma, ka la iathuh ba utei u briew u la thmuban pynmynsaw bad ban thombor khnang- khnang ia kitei ki nongiaid kjat bad ki nongñiah cycle.
U nongmudui u la ong ba katei ka jingshah tynrah kali ka la jia ha kawei ka surok kaba pyniasoh ia ka shnong Dolus d’Oleron bad ka Saint-Pierre d’Oleron. Kumjuh ruh na ka liang u heh ka Dolus d’Oleron, u la pynthikna ba utei u briew u dei u nongshong shnong jong katei ka nongbah Dolus d’Oleron.
