Gaza, Naiwieng:
Katkum ki khubor, la ong ba ka Israel ka la leit hiar thma biang da ki liengsuiñ sha Gaza, ha kaba 27 ngut ki la khlad ha ka Sngi Balang, ong ki heh sorkar ha ka Strip, ha kaba ka Israel bad ka Hamas ki la kynnoh iwei ïa iwei pat ba ki la pynkheiñ ïa ka jingsangeh thma kaba tlot ha ka jaka jong ka Palestine.
Ki jinghiar thma ki long napdeng kiba la pyniap briew tam ha Gaza naduh ba la sdang treikam ka jingiateh kular ha u bnai ba la dep, bad ki la wan ha ka por ba ka Israel ruh ka la pynbna ia ka jinghiar thma kaba thmu ia ka Hezbollah ha Lebanon wat hapdeng ka jingsangeh thma kaba la jan dap shisnem hangtei.
Ki don 14ngut ki briew kiba la shah pyniap ha ka Sngi Balang ha ka nongbah Gaza kaba don shaphang shatei bad 13ngut ha ka thain Khan Yunis kaba don shaphang sepngi, ong ka khubor jong ka tnad iada ri paidbah jong katei ka thain, kaba treikam hapoh ka jingsynshar jong ka Hamas. Ar tylli ki hospital ba la iakynduh da ka AFP ki la ai ia kajuh ka jingkhein.
Ki shipai Israel ki la ong ba ki hiar thma ïa ka Hamas hadien ba ki lehnoh ki la siat sha ka jaka ba ki shipai ki treikam ha ka thaiñ shatei lam mihngi kum ka jingpynkheiñ ïa ka jingïateh kular ban sangeh thma.
Ka Hamas ka la kyntait ia katei ka jingkynnoh bad ka la kynthoh ia kitei ki jingshah thombor kum ka “jingpynjur kaba shyrkhei” kaba lah ban buh jingma ia ka jingsangeh thma, kaba la pynlong bunsien naduh ka 10 tarik u Lber wat hapdeng ki jingbthei.
U Ahraf Abu Sultan, 50 snem ka rta, u iathuh ha ka AFP, ba u la leit phai sha la iing ha Gaza City ryngkat bad kiba ha iing jongu, ha ka Sngi U Blei, hadien ba u la shah pynkynriah jaka ha ka thain shatei lam mihngi, la shisnem kynthih.
“Ngi la lah tang khyndiat ban maramot ia kawei ka kamra ha ka iing jong ngi kaba la shah pynpra ban pyrshang ban shongthait tang ar sngi mynshwa, bad ka jingbthei bom bad ka jingiap ka la sdang biang. Kim ailad wat ban ring mynsiem,” u la ong.
Ka para nongshong shnong jong ka nongbah Gaza, ka Nivine Ahmed, ka la ong ba ka la ïakren bad uwei u para marjan jong ka, haba ki jingbthei bom jong ka Israel ki la pynkylla lut ïa kiei kiei baroh ha ka shi sekhon.
“Ngi la iohsngew ia ka jingsawa jong ki jingbthei bad ngi la iohi ia ka tdem kaba kiew. Ki briew ki la ia mareh bad ki siren jong ki kali kit nongpang ki la pyrta, ki la rah noh ia ki martyr,” ka la ong.
