Washington, K’lyngkot:
U Donald Trump u la pynbna ba u dei u “President ba shipor jong ka Venezuela, uba mynta ha une u Kyllalyngkot 2026.” La shna dur kum ka sla jong ka Wikipedia ba la pynbeit thymmai, ka dur, kaba la buh ha ki social media, ka pyni ia ka dur ba thikna jong u bad ka la thoh ia ka por treikam jong u kum u President ba 45 bad 47 jong ka ri America.
Ka sla ba shisha jong ka Wikipedia kam shym la buh kyrteng ia u Trump kum u President ba shipor jong ka Venezuela, bad ym shym la don ruh kano kano ka seng pyrthei kaba la ithuh ia katei ka jingkam.
Katei ka pyllait paidbah, ka long hadien ba ka US, ka la kem bad weng noh ia U Nicolas Maduro, u President Venezuela, ia uba la shah pynkit da ka liengsuiñ sha New York ryngkat bad ka kurim jong u, kiba la shah kynnoh don kti ha ki kam khaïi droks bapher. Kane ka jingkhynra ka la jia hadien bun bnai jong ka jingpynbor jong ka US, ki jingpynjari kyndon bad ki kam shipai kiba thmu ïa katei ka ri kaba riewspah ha ka umphniang. U Maduro u la kam ba u la shah “rahbor.” Ka China, Russia, Colombia, bad wat ka Spain ruh ki la ong ba katei ka jingleh jong ka US ka dei ka jingpynkheiñ aiñ kaba paw pyrthei, kaba long ruh pyrshah ïa ki aiñ jong ka pyrthei.
Hadien katto katne kynta jong ka jingkhynra, u Trump u la pynbna ba ka US kan “pyniaid” ïa ka Venezuela shipor, da kaba kdew ïa ka jingeh ha ka liang ka jingïada bad ka jingdonkam ban don ka jingkylla ha katei ka ri. U la ong ruh ba ka US kan peit bad die ia ka umphniang Venezuela sha ki iew pyrthei ha kane ka por ba mynta shipor.
Hapoh jong ka Venezuela, ka nongsynshar kaba ar jong u Maduro, ka Delcy Rodriguez, ka la bam smai kum ka President ba shipor jong katei ka ri. U Rodriguez, u la kyntait ïa ki jingkam bor jong ka US, da kaba dawa ban pyllait noh ïa u Maduro bad pynbna ïa u, kum u nongïalam ba dei hok jong ka
jaitbynriew.
