Malasya, K’lyngkot:
Ka ïingbishar jong ka Singapore, ha ka Sngi Ba-ar, ka la rai pynrem ïa uwei u rangbah na Malaysia, uba dei na India, da kaba rai set patok haduh 12 snem kynthih, ha ryngkat 15 sympat ki jingshah pynshitom, namar ba u la shukor ia 3 ngut ki kynthei, kiba la ngop bad poi iashong bad u khlem da tip ia ki jingmut barieh jong u.
Nalor kata, la don sa 13 ngut kiwei pat ki kynthei kiba mudui da ka mukotduma pyrshah ia u Rajwant Singh Gill Narajan Singh, 38 snem ka rta, kiba la kynnoh ba ki la shah pyndik, ha kaba yn sa bishar bniah da ka ïingbishar ynda la dei ban peit thuh bad bishar ia ka mat jong u.
U Singh u la shongkurim bad don ki khun hynrei u la leit ban pynbiej bad pynngop ia bun ngut ki kynthei, kiba la ithuh ha ki kot ki sla jong ka iingbishar kum ki PW1, PW2 bad V3 – kiba la ia hap bad u ha ki kam shongkha.
Bunsien u ju shim ia ki dur bapher bapher ha ka online, bunsien u ju pynlong ïalade kum ki shynrang kiba riewspah.
U Singh, u la shah pynngat kyndon ha u snem 2020 bad u la shah rai pynrem ha ka Sngi Ba-ar da kaba shah rai set patok syndon haduh 12 snem bad shah sympat ruh haduh 15 dieng lathi.
U Deputy Public Prosecutor u Bin u la pynrem ia ki kam runar jong u Singh kum ki kam sniew, kiba pynsniew dur haduh katta ia ka jinglong jingman bad ka jingim ki kynthei- ki samla jong ka ri bad u la ong ba donkam ia ka jingtreilang kaba rieh hapdeng ki pulit jong ka Singapore bad ki pulit jong ka Royal Malaysia ban ioh kem ia u.
Ha u snem 2025, u Singh u la shah rai set patok 4 snem shiteng bad la bthah ia u ba un hap ban siew ka bai lutksan kaba SGD 7,000 (kumba USD 5,437) hadien ba u la phla ïa ki ar tylli ki jingkynnoh thok kiba ïadei bad ka V3, ka longkmie kaba 52 snem ka rta.
U la ïakynduh bad ka V3 ha ka jaka ïakynduh paralok ha kaba sdang jong u bnai Jymmang ha u snem 2019.
U Singh u la pyni kum u “Michael Nolan”, u nongkhaii ba riewspah na America uba sah ha kawei ka jhad ha Malaysia bad u la kular ban siew ia ka pisa USD 20,000 (SGD26,000) shibnai ban long ka “paralok kynthei” jongu.
U la khroh ia ka V3 ban iapoi bad u, da kaba pynbor ia ka ban iathiah bad u, bad ba un siew ruh da ka dor, hynrei um shym la siew satia ia ka.
U la leh ruh ia kane ki kam runar pyrshah ia ka PW1 kaba 31 snem ka rta bad ka PW2 kaba 32 snem ka rta, kumjuh ruh, da kaba pyni ïalade kum u briew uba heh spah bad u la kular ban siew ia ki baroh da ka dor kaba heh, hynrei um shym la siew iano- iano ruh.
U la dawa pisa kylla ruh na kitei ki 3 ngut ki nongshah shukor ha u, da kaba byrngem ban pynphriang ïa ki dur ba pawnam jongki lada kim phah ia ka pisa sha u.
Ki kot ki sla jong ka ïingbishar ki la pynpaw ba ki nongshah leh thok ha u, ki mad ïa ka jingshah ktah kaba jur ha ka liang ka jingmut- jingpyrkhat, ha kaba ïa katei ka nongshah leh thok ba la ithuh kum ka PW1, la shem hadien ba ka don ia ki jingshitom ha ka bor pyrkhat namar katei ka jingshah leh thok ha utei u briew.
