New Delhi, K’lyngkot:
Ka tnat liengsuiñ ‘Indigo’ jong ka ‘Air India’ bad ki SpiceJet, ha ka Sngi Palei, ki la pyntip ba namar ka jingbym shngaiñ ka jinglong- jingman jong ka leit- ka wan sha Iran, la pynsangeh noh ia ka jingmih jong ki liengsuiñ na India sha Iran hadien ba katei ka ri ka la khang noh ia ki lynti suiñ jongka namar ka jingma hapdeng ka jingiapher jingmut kaba la wan mih hapdeng ka Iran bad ka US ha kine ki sngi.
Ha ka jingthoh ha ka rynsan ‘X’ (ba la tip mynshwa kum ka ‘Twitter’), ka Air India ka la pyntip sha ki nongleit nongwan jong ka halor ka jingpynslem kaba lah ban jia ha ki liengsuiñ kiba palat ïa katei ka thaiñ bad ki jingpynsangeh ha kaba ym lah ban pynkylla ïa ka lynti.
“Namar ka jinglong jingman kaba la mih ha Iran, ka jingkhang hadien kata ïa ka jaka liengsuiñ jong ka, bad haba pyrkhat ïa ka jingshngaiñ jong ki nongleit nongwan jong ngi, ki liengsuiñ jong ka Air India kiba her halor kane ka thaiñ mynta ki pyndonkam da kawei pat ka lynti, kaba lah ban wanrah ïa ka jingpynslem. Katto katne ki liengsuiñ jong ka Air India ha kaba mynta ym lah ban pynkylla ïa ka lynti, la pynsangeh noh,” ong ka kompeni liengsuiñ.
Ka Air India ka ai jingmut ia ki nongleit nongwan ba ki dei ban peit bniah bha ia ka jinglong jingman jong ki liengsuin shwa ba kin leit sha kad liengsuin.
“Ka jingshngain jong ki nongleit nongwan bad ki nongtrei jong ngi ka dang long kaba kongsan tam,” ka la kdew.
Ha ka jingthoh ha ka por mynstep jong ka sngi Thohdieng, ka IndiGo ka la ong ruh ba katto katne ki liengsuiñ jong ka shabar ri ki la “shah ktah” namar ka jingkhang kynsan ïa ka suiñbneng” da ka Iran.
Ka Iran ha ka sngi Thohdieng ka la hukum ban khang ïa ka jaka suiñ jong ka ïa ki liengsuiñ kamai khlem jingpynshai namar ba ka jingïakynad ka dang jur bha bad ka US halor ka jingpynshitom beiñ jong ka Tehran ïa ki jingïakhih ha baroh kawei ka ri. Ka jingpynbna sha ki pilot, ka iathuh ba ka jingkhang, la antad, ba kan neh haduh ka por 7:30 baje mynstep, ha ka por jong ka ri, kumba la iathuh da ka tnad pathai khubor, ka Associated Press.
Ka Iran mynshwa ka la khang khyrdep ia ki jaka suin jong ka ha ka thma kaba 12 sngi pyrshah ia ka Israel ha u bnai Jylliew bad ha ka por ba ka iasiat kuli bad ka Israel ha ka thma jong ka Israel bad ka Hamas.
“Ki katto katne ki kompeni liengsuiñ, ki la dep ban pynduna ne pynsangeh noh ïa ka jingshakri, bad kiba bun ki kompeni kit liengsuiñ, ki kiar na ka jaka suiñ jong ka Iran,” ong ka website SafeAirspace, kaba ai jingtip halor ki jaka ba don ka jingïakynad bad ka jingleit jingwan da ki liengsuiñ. “Ka jinglong jingman ka lah ban ai dak ïa ka jingïada ne jingtreikam shipai kaba kham bniah, kynthup ïa ka jingma jong ka jingpynher missile ne ka jingpynkhlain ïa ka jingïada ha ka suiñbneng, kaba pynkiew ïa ka jingma jong ka jingithuh bakla ïa ka jingïaid lynti jong ki paidbah.”
