Ki Dorbar shnong ki long kum u mawdong ka imlang ka sahlang. Ki Dorbar shnong ki dei ban bat ïa ka riti ka dustur. Ka kamram ki Dorbar shnong ka long ba kin peit ba ka shnong ka thaw kan khuid kan suba bad kan don ha ka shongsuk shongsain. U Rangbah shnong ryngkat ki nongkit kam shnong ki dei ban peit ban ym don ka jingleh shiliang ïa ki paidbah nongshong shnong. Ka kamram kaba kin leh ka long ba ym ai lad ïa kino kino ki nongshong shnong hapoh ka shong ba kin tam pud ïa ka jaka kiwei. Ki nongkit kam shnong ki dei ban peit ïa ka roi ka par hapoh ka shnong. Haba pynbeit ïa kano kano ka jaka ki trai jaka ki dei ban pyni ïa ka dulir ha ki nongpynïaid shnong katno ka jaka jong ki ka don katkum ka dulir ba ki bat ym ban shu kam ba ka jaka jong ki ka poi haduh khlieh lum. Ki nongkit kam shnong kim dei ban shim eiei ne kñieh ïa ka jaka ki briew khlem ka mon jong ki trai. Lada donkam ban shim na kano kano ka jingdonkam ka shnong ka dei ban da siew da ka dor ym ban shu shim ei ïa ka jaka kiwei. Ki nongkit kam shnong ki dei ban bishar bniah lada don ki jaka ba pynmih huri hura hapdeng ki para nongshong shnong. Dei ban pan ïa ki kot ki sla ne patta baroh arliang ban tip ïa ka jingshisha shuwa ban ai jingbit ïa ki ban ker kynroh ne shna ïing shna sem. Ki nongkit kam shnong kim dei ban leh donbor halor ka hok ki trai jaka khlem ka mon jong ki. Ka dorbar shnong kam donhok hi ruh ban knieh ïa ka hok ki briew kiba don jaka ba rit baria ne kiba heh kumjuh. U Rangbah shnong bad ka kynhun jong u, ki dei ban long ki briew kiba ki nongshong shnong ki shañiah. Ka Dorbar shnong ka dei ban kyntu bad pynbna ïar ïa ki nongshong shnong ban ïasnoh kti lang na ka bynta ka bha ka miat ka shnong ka thaw. Namar haba don ka jingïaid beit ïaid ryntih hapoh shnong hapoh thaw ki nongshong shnong ki kmen ki sngewbha haba ki bor pynïaid shnong ki len ïa kaba bha ha ka synshar ka khadar hapoh shnong hapoh thaw.
C. B. Iawphniaw
