Kine ki kynrad ki dei kiba im ka jingim kaba ïapher. Naduh ba dang khynnah kum u nongrep, u trei lyngkha, trei bri tympew, bri soh bad kiwei kiwei naduh ka sngi ka jingiap ka la wan rong noh kum u nongrep. Ym don ba lah len eiei ban pynjrong ïa ka rta la jong ha kane ka pyrthei.
Namar u nongthaw nongpynlong u bat ïa ka bor nalade ba u nongrep um lah im sah ha kane ka pyrthei. U nongkhaiï ruh naduh dang khynnah la ïalam ban leit ïew leit hat ban die ki marbam mardih haduh ba ula rangbah. Hynrei ka jingiap ka la wan rong noh ïa u nongkhaiï ba un lah ban bteng ïa ka kam khaiï ha ka rta kaba la noh ka bor met bor phad. Namar u nongkhaiï ruh um donbor ban pynjrong ïa karta la jong ha kane ka pyrthei.Namar ka bor u nongthaw kam shah ban trei sah ïa ka kam khaiï haduh ka jinglong tymmen. Kumjuh u nongïalap niam naduh dang khynnah ula im minot ban shakri ïa ka kam balang ne niam ha kane ka pyrthei. Hynrei kum u nongïalap niam ruh um donbor kyrpang ban pynjrong ïa ka rta la jong ha kane ka sla pyrthei. Kumta ula shah rong noh ha ka jingiap ym pat da tymmen. Namar ngi ki briew watla ngi long nongrep, nongkhaiï bad kiba im ialap niam ruh kim donbor ban pynjrong ïa la ka jingim la jong haba ka bor u nong-thaw nongpynlong ïa ngi um sah ba ngim im sah ha kane ka pyrthei. Ka kam rep bad kam shakri niam ruh haba ka rta la palat spah snem ngin hap ïehnoh ïa ki kam ki jam bad ki jingtrei jingktah ha kane ka pyrthei. Baroh ha jinglong briew ngi ïa trei ki kam ki jam bapher bapher ha kane ka pyrthei, ngim lah shuh ban trei ban ktah haba ka rta ka la noh. Namar ka bor briew ka troin noh ha ka bor met bor phad bad bor jabieng ruh. Bad kumba tlor noh u syntiew u phlang bad ki iap tyrkhong katkum ka por ba la buh ïa ki ha kane ka pyrthei shong shipor. Kine ki kynrad kim lah ban ioh bor kyrpang na u Blei ha ki kam kamai jong ki ha kane ka pyrthei. Ngi rit ne ngi khraw ngi hap ha kajuh ka nongrim ba u Blei ula bynta ïa ngi ban im ha kane ka pyrthei.
C. B. Iawphniaw
