Kino kino ki project ne ki kam pynroi kum ki Resort la kiba heh ne kiba rit ki ai jingmyntoi ïa ka Ri bad ka jaitbynriew.
Ka ri Khasi ka long ka ri kaba itynnad ha ka jingdon ki lum ki wah ba la oh shrong ka Meimariang, kum ki lum ki wah, ki riat ki ram bad ki kshaid kiba itynnad ki long ka bynta jong ka meimariang.
Baroh ki District kiba don hapoh Ri Khasi – Jaiñtia ki long kiba la saiñdur kyrpang da u nongbuh nongthaw, nongpynlong ïa ka meimariang. Kam don kano kano ka daw ban ong ne shim ba kata ka District kam long ban ioh ne wanrah ïa ki project kiba ai jingmyntoi ïa ka roi ka par bad ki Tourism ha kawei pa kawei ka District.
Ka sorkar ka dei ban sam bynta lang ïa ki project ha baroh ki district ka Jylla, ym ban tynñian tang na kawei ne ar ki district.
Dei ban wanrah ki kam pynroi ne project kiba heh ha man kawei pa kawei ka District. Khamtam lada don ki district kiba kyntait ïa ka jingthmu ba bha ka sorkar la dei ban ai noh sha kiwei ki District kiba kwah ban ïoh ïa ki project kiba pynmyntoi ïa u paidbah. Ka jingkwah ban bun ki project tang hajan ki jaka sor ka long ka bym ïa hap. Wanrah ki project ha ki jaka nongkyndong kan bha shibun bad kan pynkiew stet ïa ka roi ka par hapoh ka Jylla.
C. B. Iawphniaw
