Ha ka jingiohi jongnga kum u riew paidbah kaba ïa dei bad ka elekshon M. P. hangne ha Jylla jongngi. Ha nga hi ngam don daw ba nga isih ïa kano kano ka parti la ki dei ki Regional parti ne ki National parti. Nga sngewtynnad ïa baroh ki parti riewlum ne ki bym dei riewlum ruh.
Hynrei haba phai halor kaba ïadei bad ka roi ka par ha ka Jylla, nga kwah ban ong kumne, ba ïa u M. P. hi la dei ban jied ïa u briew uba na kano kano ka ruling parti ba bat ha Delhi, ym ban jied ïa ki seng trai ri riewlum kaba ïa dei bad u M. P. Ka elekshon hapoh Jylla (MLA) te ngi dei ban jied ïa u briew uba tbit bad uba shañiah ha la ki jong ki jong ki constituency. Hynrei ïa u M. P. ha ka jingiohi jongnga te ngi la dei ban jied ïa u briew uba long na ka National parti.
Namar u M. P. jong ki Regional parti um lah leh eiei ne wanrah Development ïa ka Jylla. U shu leit ïa said ban kren hynrei um lah ban thaw pyrthei ba un pynioh bun ki kam pynroi ha ka Jylla. Ka bha shibun ba ïa u M. P. ngi dei ban ai lad ïa uba ïeng na ki National parti khnang ba ngin ioh myntoi ïa ka Jylla.
Kane ka long tang ka jingiohi jongnga shimet bad lada phi sngew iahap to ngin ai lad pynjop ne kyrshan ïa u kyrtong uba ïeng na ka seng ba bat synshar ha Delhi ba u n ioh mih khmat ïa ka Jylla hapoh Parliament. Nga pynpaw kumne namar baroh shi katta nga ju thep vote ïa uba ïeng na ki seng riewlum.
C. B. Iawphniaw
