Shuwa u snem 1980 ka pule puthi ruh ka dang khuid dang suba bad ka jingpule ruh ka dang bha. Hynrei hadien une u snem naduh mynta ka ïa don ka jingkylla kaba khraw bha. Ki khun samla kiba ïaleh ïa ka Exam Matrik mynshuwa ki tang shu pass ïa ka Matrik bad P. U. C. ki la ïoh kam ïoh jam bad ki la long Ophisar bad ki riew shemphang ha ka imlang ka sahlang. Katba mynta ki khun samla ki la pass ïa ki Degree bapher bapher bad haduh ki kyrdan M. A. level ruh hynrei kim donkam donjam. Kane ka jingïapher ha ka standard pule ha ki skul bad ki College mynshuwa bad mynta.
Mynta ka jingpass la sngew ba ki la palat liam ïa kaei ba ki ioh. Mynshuwa ka kam ka kren kham jam ban ïa ka ktien. Mynta pat ka ktien ka kren kham jam ban ïa ka kam. Te ïa nujor kein ka pule puthi mynshuwa bad mynta ka long kumno ? Hato kham lah kiba mynshuwa ne kham lah kiba mynta ? Kane kam dei ka jingïapher u diengkot ha ka pule puthi ha ki por mynshuwa bad kine ki sngi ba mynta. Kiba la pass Matrik mynshuwa ki kham nangkham tip bad kham stad ban ïa kiba pass Degree mynta ne phi ong kumno ? Kane ka long ka jingiohi jongnga haba ïanujor ïa ka pule puthi mynshwa bad mynta.
C. B. Iawphniaw
