Raphael Warjri
Ka ba dang shen ha ka juk thymmai mynta ka dei ka ba brai bad kyrni dih aphin (drugs) bad kaba kynrei ka shongkha khynnah kaba lam pat sha ka brai bad threw awria (prostitution) kaba la tyrbeh ha ka imlang sahlang, khlem lah shuh ban teh lakam.Na ka por sha ka por la lap ba ki khynnah rit kiba dang dei ka por ban lehkai byrngia ha madan madiah ne ha atad ha mynshem, hynrei ki la nang ban shang makia sha lynti syngkien bad pyrthuh bud ïa ka pyrthei ha byllai ki kam sniew.Kawei pat ka bynta ka dei kaba shohbieit ïa ka rongphong pyrthei khlem da tip la ka dei kaba myntoi ne kaba ym myntoi ïa la ka longrynñieng lajong. Ha ka pyrkhat ba lyngkot jingmut te kito kiba bieit rongphong ki sngew kumba kaba myntoi bad hun mynsiem ban ïa beh lem kumba leh kiwei kiwei, khlem sngewthuh katno kan ïaineh ban myntoi ïa ka jingim shimet shilynter. Ka kam awria ka dei kaba la ju don barabor naduh mynno mynno, wat lada ka imlang sahlang ka phai lyndet na ka jingshisha.Byllai na kiba la san la rangbah ne wat kiba la jan noh tymmen ki la mad ïa ka jingshisha bad ki sngewthuh ynda la dier ka por. Kiba kham kloi ban ngop ha ka kam awria dei ki samla lud kynthei, ba ynda ki la duh noh ïa la ka jinglong sotti, ki la shah tehmraw syndon ha kane ka kam pohdor. Kita kiba la san la rangbah kiba la ïaid lyngba ïa kane ki sngewthuh ïa ka jinglong kaba kordit bad syrtok ynda haba ka met baplung jong ka long-rynñieng kynthei kam ïaid dor shuh. Kumta ka shong ha ka sneng ka pyni, ka kyntu ka kynpham ïa la ki khun ki pyrsa ba kin sngewthuh ïa kata ka jingshisha kaba ym tang ba shem lanot hynrei jah burom shilynter.
Ha kaba ïa dei bad u aphin pat ka don ka daw bah ka ba kham khraw bad kaba buhrieh na ka jingtip jong ki paidbah. Ban sngewthuh bha ïa kane ka phang, lah ban ai nuksa ïa ki katto katne ki kynhun runar kiba don ha kylleng ka pyrthei, kiba lah ban shna spah na ka lawei jong ki paidbah ha ka imlang sahlang. Ha man la ka ri ha kylleng ka pythei ki don kum kine ki kynhun runar kiba pynpaw ïa lade kum kiba bha bad ki ba kyntiew ïa ka imlang sahlang. Kane ka kam ka kylla khraw namar ba ka wan mih pyrthei na ki heh saipan kiba korbar ïa ka khaiï ka ba palat liam ha kano kano ka jaka. Lada ha khmat ka pyrthei la paw ka kam khaiï ka ba sule kam ha ïew ha hat ba ki paidbah ruh ki lmun ban thied ban pet, hynrei na barieh ka don ka rukom khaiï buhrieh khnang ban kyrshan ïa kata ka kam khaiï kaba paw kum kaba bha na ka byhta ka imlang sahlang. Ha kane ka rukom u aphin u dei u thning uba parpaiñ sha kiwei kiwei pat ki kam sniew kum kaba pynphriang ïa ka kam awria, ka tuh ka thiem, ka pyniap briew bad baroh ki kam bymman ba shyrkheit tam. Kumta u aphin u ïaid ryngkat ryngkat bad ka kam awria kynthuip ka ba khaiï kynthei ban pynngop ha kane ka lanot, ka tuh ka thiem, ka pyniap briew, ka khaiï tuh, ka knieh jubor ïa ka spah ka phew bad ki jingdon jingem ter ter.
Kumta ka kam awria ka dei tang shibynta na ka kam khaiï aphin kaba dei ka tyllong jong baroh ki kam sniew kam bymman ha pyrthei.Ka la don ka khep ba wat ka sorkar ruh ka pyndonkam da kane ka kam bymman na ka bynta ban ioh kurup ïa ka khaiï pateng bad khatduh ban ioh synshar donbor ha kata ka jaka ba ki thmu. Ka don kawei ka nongmuna ba mynnor ka sorkar Bilat ka la kynshoit bad pynshlur ïa ka khaiï aphin ha Ri China haduh ban da ioh ban synshar donbor ïa kawei ba na ki bynta jong ka Ri China. Ha kaba nyngkong la buh da ki riewsniew ba buitpoh ban pynkhihwin ïa ka saiñpyrthei, kiba pynshoi ïa ki samla ki ba dang shongshit. Suki suki la pynbieit ban ioh pisa shibun na ka bynta kita ki samla da ka ba pynïaid ïew ïa u aphin ha ki para samla, namar ba u aphin u dei u jingdih buaid uba kloi ban pynlong ïa ki samla ba kin brai ha ka ba nyngkong bad hadien ki sa threw haduh ba ym lah shah lada ym ioh ïa kaba ki jrah. Ynda ki samla ki la jrah palat liam, sa poi sa ka kyrduh ban ioh ïa u aphin. Ha kata ka rukom ki briew ki kylla ban long nongtuh nongthiem shwa tang ban ioh pisa ban thied aphin da kano kano ruh ka lad bad dei hangta ba kiew dor bad kiba khaiï ki don ka jingioh nong ka ba bun syrtap. Ki samla kynthei ynda ki la ngop ha u aphin, lah ban poi sha ka kam awria tang ban ioh pisa na ka bynta ban ioh thied aphin.Lada ka kam tuh bad kam awria kam treikam bha ki lah ban poi shaduh ka pyniap briew bad kino kino ki kam bymman kiba shyrkhei.
Ha kane ka rukom ka sorkar Bilat ka la jop thma da kaba pyntroiñ ïa ki samla ki ba dei ka jingkyrmen ïa ka lawei jong ka imlang sahlang bad ka bor kaba khraw ban ïaleh ïa kaba sniew baroh. Te haba kita ki samla kiba khlaiñbor bad don ka mynsiem shitrhem ban kyntiew ïa ka imlang sahlang bad kiba long ka jingkyrmen ïa ka lawei, ki la ngop bad kyrni noh ha u aphin haduh ban da troiñ syndon ka met ka phad, ka jingkoit jingkhiah, ka bor jingstad jingshemphang bad ki la kylla mangka-riang ha ka imlang sahlang.
