Kane ka juk ne ka hajar snem kaba mynta ka long kaba sniew bok tam eh namar ngi la duh noh ïa u Jisu uba long u nongpynkhiah ïa kiba pang ba shitom, kiba dkoh, kiba matlah, ki bym nang kren kiba pang ïap shiliang, kiba shong ksuid, kiba pang mihsnam kiba kyllut, kiba pang bhur bad bun kiwei kiwei kum ha ki por ba u Jisu u dang im ha kane ka pyrthei. Jin lada u dang don haduh mynta ngi ngeit ba ka pang ka shitom ki la ïoh jingkoit ha ka por ba u Jisu u dang don ha kane ka sla pyrthei. U la pynkhiah ïa u shakri u Rangbah shispah bad u la py nim pat ïa u khun ka riew kynthei.
Nangta ula pynim pat ïa u Lasaros uba la ïap bad tep haduh saw sngi na u lum jingtep. Kine ki long ki kambah kiba khraw kiba la leh na ka por ba u Jisu u dang don ha ka sla pyrthei. Katba mynta pat ym don shuh kano kano ka bor kaba lah ban pynkhiah bha bad pynjem ïa kiba pang ba shitom kum ha ka por ba u Jisu u dang don ha kane ka pyrthei.
Watla ngi wad ki lad ki lynti bun rukom da kaba dih ki dawai dashin ruh ym don ka jingïoh jingkoit pura kum ha ka por u Jisu. Hooid ka jingïap ka la don naduh ka por u Moses haduh kine ki sngi ym don ba lah ban khanglad ïa ka jingiap. Ka jingïap ka pynkhuslai ïa ngi ki briew jong kane ka pyrthei. Namar ym don uwei ruh u ban lait na ka sñi jong ka jingïap. Ka jingïap kan rat naphang lin ïa baroh ki kynja baim baroh. Naduh hyndai hynthai ki kpa tymmen haduh kine ki sngi ym pat don wat uwei ruh na kiba ïap ki ban ïoh im biang. Shisha ba la ïap bad duh noh ïa ka mynsiem, ka jingim briew ka la kut noh shi junom bhor. Kane ka long ka jingshisha katkum ka paidbynriew kaba la leit bad ka ban sa wan ruh.
C. B. Iawphniaw
