Kum ki briew ngi ïapher ka jinglong bad ngi ïapher ka rukom im. Ha ka jingïohi jongnga baroh ngi ki briew la ngi long ki nongtong dohkha, ki nongrep, ki nongkhaïi, ki nonghikai skul, ki nongtih maw tih shyiap, ki nongbylla sngi, ki nongtrei kam sorkar kiba long nongmih khmat paidbah, ki nongsynshar hima sima, ki nongdie dukan, ki nongñiah kali, ki nongri jingri, ki nongthoh kot thoh sla, ki nongïalap niam, ki nongrwai nongshad, ki nongtem nongput, ki nongtrei karkhana, ki nongjngi um, ki nongïaleh kai sport, kiba long Syiem ne patsha, kiba long shipai ne police kiba long nongñiah liengsuiñ, ki nongkiew lum, ki nongngam um bad bun kiwei kiwei, ngi don ka jingïapher ha ka rukom im bad ha ki kam ki jam ba ngi trei, hynrei ha kaba khadduh ngi ïa wan ha kajuh ka lynti kaba pyndiaw ïa ka jingim haba ngi la hap ban jam noh sha ka jinglong tymmen bad ha kaba khatduh ngi hap ban ïehnoh ïa kane ka pyrthei kaba ngi ïa im kmen shipor. Namar ym don uwei ruh uba lait im na ka sngi ka jingïap kaba long ka nongshun kaba khrawtam eh ha ngi ki briew. Hato kane ka dei ka rukom im jongngi ki briew hangne ha sla pyrthei. Watla ngi duk ne riewspah ngi la ïoh kajuh ka bam ka dih ha ki sngi ba khatduh ha kane ka pyrthei.
C. B. Iawphniaw
