Aizawl, Jylliew:
Ka sorkar Mizoram ka thmu ban buh ïa ka projek pynmih bording kaba 132-MW ha ka wah Tuivai kaba don ha Saitual distrik hajan khappud ka Manipur ban pynkhlaiñ ïa ka jingpynmih bording hapdeng ka jingkiew ka jingdawa bording ha kane ka jylla.
Ha kaba ïadei bad kane ka bynta, u Myntri Rangbah u Lalduhoma u la pynïaid ïa ka jingïalang ban bishar bniah ha ka kyrdan ba hakhliehduh kaba la pynlong ha ka sngi Balang, khnang ban pynkloi ïa ka jingthmu ban pynstet ïa ka Tuivai Hydroelectric Project, kaba la antad ba kan kot sha ka T.2,289.50 klur bad la khmih lynti ban pyndep hapoh san snem.
Ha kane ka jingïalang la don lang u Myntri ka tnat bording u F Rodingliana bad ki heh ophisar jong ka Power and Electricity Department.
Ki heh sorkar ki la ïathuh ba ïa ka Detailed Project Report (DPR) na ka bynta kane ka projek la dep ban pyndep bad ka jingtyrwa mynta ka la long kaba la khreh na ka bynta ban ai tender.
Ka sorkar jylla ka dang wad ruh ban pyntreikam ïa kane ka projek kum ki jingpyntreikam hapoh ka Public-Private Partnership (PPP), la bynrap ki heh sorkar.
Katkum ka jingpeit bniah ïa ka bording ilektrik kaba 20, la ong ba ka jingdawa bording kaba heh tam jong ka Mizoram mynta ka long haduh 182 MW bad la antad ba kan kiew sha ka 213 MW ha u snem 2030.
Watla ka jylla ka don ïa ka jingpynmih bording ba la buh kaba 50.20 MW, hynrei ka jingpynmih bording ba shisha ka dang duna bha, ha kaba tang kumba 10 percent na ka jingdonkam bording baroh kawei la pyndap mynta lyngba ka jingpynmih bording ha ka thaiñ, la ong ki heh sorkar.
Ka jylla ka pynlut haduh T.649.54 klur man la u snem ha kaba thied bording, khlem da kheiñ ïa ka bai pynpoi bording, kaba pynlong ïa ka jingpynheh ïa ka jingpynmih bording ha ka thaiñ kum ka bynta ba kongsan jong ka sorkar.
Ki heh ophisar ki la ïathuh ba ïa ka Tuivai Hydroelectric Project la jurip nyngkong eh da ka Central Water Commission ha u snem 1992 ha kaba la tyrwa ban pynmih bor ding 210 MW.
Hynrei namar ba ka bynta jong ka jaka ba la tyrwa ban shna dam ka la nang kiew shaduh ka Manipur kaba marjan, la shna thymmai ïa ka projek bad la jurip biang ïa ka jingthew.
Hadien kata la pynkhreh ïa ka DPR ba la pynkylla thymmai da kaba pynduna ïa ka bor pynmih bording kaba 132 MW.
Ka jingïalang ban bishar bniah ka la bishar ruh ïa ka jingdonkam pisa man la u snem ban pyntreikam ïa ka projek da kaba ïamir jingmut bad ka tnad pla tyngka.
Lait na ka projek Tuivai, ha kane ka jingïalang la bishar bniah ïa ka jingïaid shaphrang jong ka Tuirini Hydroelectric Project kaba dang ïaid shakhmat bad ki kam kiba dang ïaid shakhmat hapoh ka Revamped Distribution Sector Scheme (RDSS).
Ki heh sorkar ki la ïathuh ba la pynlong ruh ïa ka jingïakren halor ki mat ba la buh bad u Manohar Lal Khattar ha jingleit jngoh jong u sha Mizoram.
