Ki Karkhana Sainar ba la ai jingbit ka sorkar Meghalaya ïa ki Kompeni dkhar sainar ki don shibun ha Meghalaya ba la ai jingbit ka sorkar naduh mynshwa haduh mynta. Kine ki karkhana Sainar ki la kylla long ki Thlen bam khlaw ba shyrkhei haduh katta katta kat haduh ba ki khlaw ha ri Khasi – Jaiñtia kila jan duh lut bad dieng rit diengbah baroh naphang, kine ki Karkhana ba heh ba don ha byrnihat bad kiwei ki jaka ba la ai jingbit da ka Sorkar sha ki dkhar ki pyntrei kam da ka rnga dieng ha kaba sainar, ki thied lut ïa ki rnga na ri Khasi – Jaiñtia kiba la thang naduh ki dieng barit baria bad diengbah baheh baroh naphang. Ki trai khlaw trai khyndew ki kmen sahuh mynsiem ba ioh die rnga bad ioh pisa shibun ba ioh ban die ïa ka rnga na ki dieng lung ba dang rit ruh bad ki khlaw ki la nangduh nangsyllen noh ki lum ki khlaw. Ka sorkar ka ju ong ïa ki paidbah to wat nym pynjot noh ïa ki khlaw ba kan ktah ïa ka jinglong ka mariang bad ïa u slap ka lyer bad ka sawdong sawkun bad ka jingstad Saïan (Science) ruh ka ong kumta. Ki trai khyndew trai khlaw pat ki ong ngin pom dieng katba mon thang rnga katba mon ïa ka khyndew la jong ïa kane ka bynta imat ka sorkar kam lah leh eiei shuh mano mano ruh ym leh eiei shuh katba ka sorkar ka ong wat nym pomdieng ban thang rnga katta nang jur ka jingpom dieng bad thang rnga. Ngi ki paidbah ba don ïa ka jingsngewkitkhlieh ïa ka jingpynjot ïa ka mariang ngi shu peit da ka jingsngewkhia ka mynsiem ngim lah leh eiei shuh. Ym don shuh ba lah ban leh eiei ban ïada ïa ka jingpynjot ïa ka mariang wat ki sengbhalang seng samla ne mano mano ruh. Ki briew jong ka sorkar ki heh sorkar ba don ha ka bor ban pynïaid ïa ka sorkar ki lah ban leh mon katba ki sngewbit ma ki ban ai jingbit ïa ki dkhar heh spah ban seng karkhana sainar. Ka sorkar ka ai jingbit ïa kine ki Karkhana sainar kiba la kylla long ki Thlen bam khlaw naduh mynta haduh ki spah snem ki ban sa wan.Shisien ba ka khyndew jong ngi ka ïa leit sha u bar jylla kan san eh hi kumta ka jingpynjot ïa ki khlaw kan ïai bteng. Ki paidbah trai jylla jongngi kim da ïoh jingmyntoi eiei na kine ki karkhana ba la ai jingbit da ka Sorkar ki ioh tang ïa ki kam barit baria kum ki kam pynkhuid ïing, pynkhuid painkhana, pynkhuid office bad katto katne ki kam Dribar kam ap khyrdop (Gate) ïa ki kam ba heh baroh la trei hi tang da ki dkhar bar jylla suda. Ka sorkar ka dei ban pyrkhat bha ban ai jingbit ïa ki Kompeni dkhar bar jylla kan pynjot ïa ka mariang jong ngi.
Dr. Boss L. Marthong New Nongstoiñ
