I. R. Dkhar
Ha kine ki sngi, ngi la iohi ïa shibun ki jingjia shah tuh ïa ki tiar ki tar bapher bapher ha ki shnong bad ki dong bapher bapher jong ka sor Shillong wat sha nongkyndong ruh. Ngi la iohi na ki Kotkhubor ïa ki jingjia shah tuh ki arshaka bapher bapher, ki jingshahtuh na ki ïing ki sem, ki jingsniew kum ki drok bad kiwei kiwei ki jingsniew man ki sngi. Bad kine ki jingshah tuh bad ki jingsniew kin nang ïai jia na kawei ka sngi sha kawei pat. Shibun ruh la ïakren sharum shaneng bad ki paralok, ki bahaïing hasem shaphang kine ki jingshahtuh.Kiba shah tuh, ki la ai jingtip ne ki First Information Report (FIR) sha ki Police Station, hynrei nalor kata ruh ym ioh ban kem ïa ki.Nalor ki nongtuh, ki don ruh sa kiwei pat ki kam sniew kum ka thok ka shukor, ka bam ka dih, ki ktien ki thylliej ki bym sngewtynnad ha ka shong ka sah. Khamtam ha kine ki por, ki ju wan ki jinglyngngoh ba balei ki briew bad ki samla kynthei bad shynrang wat haba la tip ïa ki ba ki long kiba sniew ïa ka met ka phad, ia ka jingkoit jingkhiah, ki dang leh ïai dih bad ïai leh.
Haba ngi pyrkhat ïa kine ki jingsniew kiba nang jyllei ha ki shnong ki thaw, ha ka imlang sahlang man ka sngi, ka donkam ïa ka jingïatreilang jong ki Dorbar Shnong ha ki shnong ki thaw bapher bapher ym tang hapoh sor Shillong hynrei wat sha ki nongkyndong ruh.Lada ym don ka jingïatreilang bad ka jingïatylli lang hapdeng ki Dorbar Shnong bad ka Sorkar, ka long kaba eh ban rat dyngkhong ïa kito ki jingtuh jingthiem, ki jingsniew na ki jingdih drok bad ka jingwan die ïa ki ruh, ha ki shnong ki thaw jong ngi.Namarkata, la donkam ban don ka Village Defence Party (VDP) kaba treikam, kaba khlaiñ ha kine ki por ha ki shnong ki thaw. Hooid, ngi la ju tip bad iohsngew ba la kita ki VDP ha ki katto katne ki shnong ki thaw. Hynrei ha kine ki sngi, ngim ju iohsngew shuh ïa kita ki VDP kiba treikam shisha. Ha u bnai Lber mynta u snem, da kaba burom ïa i Bah Paul Lyngdoh, MLA, Mawprem, i la pynkhie im ïa ki VDP ha ka shnong Mawprem, ka constituency jong i.I Bah Paul i la kyntu ruh ïa kiwei pat ki shnong ki thaw ruh ba kin seng kin buh ïa ki VDP. Bad ïa kito kiba la don pat ba kin pynkhie im ïa ki VDP ha ki shnong ki thaw jong ki. Ka dei ka jingshisha bad dei tang lyngba ki VDP, ba kan long ka jingshngain bad jingsuk ha ki shnong ki thaw. Nga sngew ban ong ba baroh ki VDP kiba yn seng ne kiba la don ruh, ki dei ban register bad ki Police Station bad ruh bad ka Sorkar. Dei ban don ruh ka kynja skhim na ka Sorkar, kum ha ka jinglut jingsep, ki jingdonkam kum ki uniform, ki kyndon aiñ ki kyndon kanun bad kiwei kiwei, ban thaw lad bad rah sha ka Sorkar khnang ba kine ki VDP ki neh ki sah bad ka jingtreikam jong ki ruh kan long kaba ïaid bha bad ïaid beit ïaid ryntih. Haba don ki VDP, ki nongtuh bad ki riewsniew ne ki nongdih nongbuaid, ki riewthok ki riewshukor bad ki nongdih drok, kin shah kem ha ki VDP. Ki riewsniew kim tieng bad kin nym nud. Ka shnong ka thaw ruh kan shngain ha ka shong ka sah.Ki nongshong shnong, khamtam ki baduk batoi, kiba don ki jingeh jingshitom ne kiwei pat ki jingeh, kin ud kin nam sha ki VDP ban ioh ka jingïarap. Ka shnong ka thaw kumno kan bha bad shong suk shong sain lymda dei da ki VDP. Baroh ki briew kiba la nang la stad khamtam kiba don hapoh Sor, ki sngewthuh bad kim don lad ruh ban kner ïa ki kti ki kjat ha ki jingshah tuh shah thiem,ha ki jingsniew ïa ka imlang sahlang lymda dei lyngba ki VDP. Kan don ka jingïa-sngewthuh jingmut, ka jingïatreilang bad ki Dorbar Shnong. Ka jingsuk jingbha jingmiat ha shnong ha thaw, ha ka imlang sahlang, kan wan da ka jingdon ki VDP wat la kam long 100 per cent ruh, hynrei ki kam sniew kin duna shibun shah.
Namarkata, ngi khmih lynti ba lyngba kane ka jingai-jingmut, ngin sa iohsngew bad ngin sa tip ïa ki jingdon ki VDP ha ki shnong ki thaw la ha sor ne nongkyndong ban ïarap ïa ka Sorkar ha kaba tem ïa ki kam sniew laipherjait.
