Aizawl, Jylliew:
Ka jylla Mizoram ka la mad ïa ka jingjulor bad ka jingduhnong ha ka ïoh ka kot kaba palat ïa ka T.1,291 klur na ka daw jong ki jingshah lynshop ha ka mariang bad ki jingpang kiba la pur hapdeng u snem 2021 bad 2025, katkum ka kaiphod jong ka Post Disaster Needs Assessment (PDNA) kaba la bishar bniah ha ka jingïalang jong ka State Disaster Management Authority kaba la long ha ka 25 tarik, Jylliew.
Ki tyllong khubor ba thikna ki ïathuh ba ka kaiphod ka la antad ba ka jingduhnong baroh kan long T.1,291.11 klur, kynthup ïa ka jingjulor ha ka met kaba shongdor T.656.76 klur bad ka jingduhnong ha ka ïoh ka kot kaba kot sha ka T.634.35 klur.
Ka jingkhmih bniah ka la ithuh ïa ka erïong Remal, African Swine Fever (ASF), ka jingtwa khyndew kaba mih na ka jingjur jong u slap bad ka jingshah ktah ha ki khñiang ha ki katto katne ki bynta jong ka jylla kum ki jingjia ba shyrkhei kiba la ktah ïa ka jylla Mizoram ha kine ki san snem.
Katkum ka kaiphod, la antad ba yn donkam haduh 879.82 klur tyngka na ka bynta ki jingpyrshang ban pynbha bad tei pat ha kylleng ki bynta bapher bapher kiba la shah ktah ha ki jingjia ba sngewsih.
Ha kane ka jingïakynduh, ka SDMA ka la bishar bniah ruh ïa ka draft jong ka Mizoram State Disaster Management Plan 2026 bad ki plan ban ïada na ka jingshah lyngshop ba la pynkhreh da baroh shiphew tylli ki distrik jong ka jylla. Ki jingthmu ki thmu ban pynkhlaiñ ïa ka jingpynkhreh na ka bynta ki jingjia ba sngewsih, ki lad jingïarap bad ka jinglah ban ïaleh pyrshah ïa ki jingjia ba kyrkieh ha ka lawei.
- Ka jingïalang ka la ïakren ïa ki lad ki lynti ban pynkhlaiñ ïa ki Project Management Unit (PMUs) kiba treikam hapoh ki prokram pynduna jingjulor ba kongsan jong ka ri, kynthup ïa ka projek pynduna jingma na ka jingtwa khyndew, ka projek pynduna jingma na ka jingkhynñiuh jumai ha ka ri bad ka skhim pynduna jingma na ka jingpluh khlaw.
Ki heh sorkar ki la ong ba ka jingthmu ka long ban pynthikna ïa ka jingpyntreikam kaba paka ïa ki lad pynduna ïa ka jingma na ki jingshah pynjulor ha kylleng ka jylla.
Ka bor pynïaid ka la bishar bniah ruh ïa ka jingbteng ban pyntreikam ïa ka Emergency Response Support System (ERSS) bad ka la mynjur ïa ki 178 tylli ki projek hapoh ka Recovery and Reconstruction Fund na ka bynta u snem 2024-25 ha ka jinglut kaba la antad ba kan long T.11.44 klur.
Napdeng kiwei pat ki mat ba kongsan ba la ïakren ka long ka jingtyrwa ban pynbna ïa ka jingpang African Swine Fever (ASF) kum ka jingshah ktah ha ka jylla, ka ban pynlah ban pyndonkam ïa ka jingïarap jong ka State Disaster Response Fund (SDRF) khlem ka por ba la buh na ka bynta ki nongri jingri kiba shah ktah bad ki nongkhaïi.
Ka jingïalang ka la ïakren ruh halor ka jingthied ïa ki tiar wad bad pyllait im ba kham bun ban kyntiew ïa ka jinglah jong ka jylla ban ïarap kyrkieh.
