Guwahati, Jylliew:
Ka Tnad Transport jong ka Assam kan sa pyntreikam noh shen ïa ka Standard Operating Procedure (SOP) kaba pynlong ïa ki test ñiah kali kum kiba donkam na ka bynta baroh ki nongaplai license bad ban khanglad ïa ka jingai license shabar jong ka distrik trai jong u nongaplai, ong u Myntri ka tnat Transport u Charan Boro ha ki khyndiat sngi ba la leit.
Haba pynbna ïa kane ka jingthmu ban pynkylla thymmai ha ka por ba u leit jngoh ïa ka District Transport Office (DTO) ha Guwahati, u Boro u la ong ba ka tnad ka la ïoh bun tylli ki jingujor ba la ai ïa ki license ñiah kali khlem da don ki nongaplai kiba wan ban test ñiah kali.
“Ki la don katto katne tylli ki jingkynnoh ba bun ki briew ki ïoh license ñiah kali khlem da wan mih sha ka driving test.Ngi la ïoh ruh ïa ka jingujor ba ki don ki kandidet ki bym leit wat tang ha ka test hynrei ki dang ioh license, ki don ruh ki khep ba ki briew na kawei ka distrik ki leit sha kawei pat ka distrik ban ïoh ïa ka driving licence”, la ong u Myntri.
Hapoh kane ka SOP ba la tyrwa, ki nongaplai kin hap ban wan hi dalade ban leh ïa ka test ñiah kali shwa ban ai ïa ka laisen. Ki kyndon thymmai kin khang ruh ïa ki nongaplai ban ïoh ïa ki license ñiah kali na kiwei pat ki distrik lait na ki jong ki.
U Boro u la ong ba la wanrah ïa ki jingpynkylla namar ka jingkiew jong ki jingujor bad ka jingbteng ban kiew ki jingjia aksiden ha surok.
U la ong ruh ba katto katne ki ophis jong ki District Transport ha kylleng ka jylla ki duna ïa ki jaka test ba kyrpang ban ñiah kali.
“Lada ym dei mynta u snem, te haduh u snem ban wan man la ka ophis jong u DTO kan don ïa ka jaka test ñiah kali kaba kyrpang, nga la shim hi ïa kane ka jingkitkhlieh, shisien ba la buh ïa ki jaka test ñiah kali ha man ki DTO ngin sa lah ban pynthikna ba tang ki nongñiah kali kiba la tbit kin ïoh ïa ki license,” u la ong.
U Myntri u la ong ba un leit jurip ïa ki District Transport Office ha kylleng ka jylla ban bishar bniah ïa ki jingtei bad ban buddien ïa ka jingpyntreikam ïa ki jingpynkylla ba la tyrwa.
Katkum ka jingkheiñ jong ka tnat pynïaid kali jong ka Jylla, ka Assam ka la ïoh 4,219 tylli ki jingjia aksiden surok bad 1,008 ngut kiba ïap hapdeng u bnai Kyllalyngkot bad Lber jong une u snem, haba ïanujor bad 4,232 tylli ki jingjia aksiden bad 1,035 ngut kiba ïap ha kajuh ka por ha u snem 2025.
Haduh shiteng na kiba iap ki dei na ki khyndai tylli ki distrik kiba kynthup ïa ka Guwahati City, Kamrup, Nagaon, Lakhimpur, Sonitpur, Golaghat, Barpeta, Dhubri bad Hojai.
