Aizawl, Jylliew:
Ki la don palat 46,000 tylli ki kyrteng ba la shah pyndam noh na ki thup kyrteng jong ki nongthep vote jong ka Mizoram hadien ba la pyndep ïa ka jingpyntreikam ïa ka Special Intensive Revision (SIR) ïa ki thup nongthep vote jong ka jylla, la ong u heh ophisar jong ka elekshon ha ka sngi U Blei.
Ka jingpynshisha ha baroh kawei ka jylla, kaba la sdang naduh ka 20 tarik, Jymmang, ka la kut noh ha ka sngi U Blei hadien ba baroh ki Enumeration Forms ki la lah ban pynkylla Digital da kaba jop, ong ka Ethel Rothangpuii, Joint Chief Electoral Officer ka Mizoram.
Ka la ong ba baroh 46,191 ngut ki nongthep vote ki la shah weng na ka thup thep vote namar ki daw bapher bapher, kynthup ïa ka jingïap, ka jingwan buhai shnong, ka jingpynrung kyrteng arsien bad ka jinglong bym lah ban wad bniah.
Napdeng kito kiba la shah weng, la lap ba 21,290 ngut ki nongthep vote ki la khlad noh, 8,352 ngut ym shym la lah ban wad ha ka por ba pynshisha, 13,992 ngut ki la leit sah noh junom sha kiwei pat ki jylla ne ki ri, bad 2,245 ngut la ithuh ba ki dei ki nongthep vote kiba long arngut briew.
Nalor kata, la weng noh ïa ki 312 ngut ki riew shimet hadien ba ki la kyntait ban pynrung kyrteng ne pynrung kyrteng biang ha ka por ba pynlong ïa ka jingpynkylla namar ka jingngeit niam, watla ki la shah pynrung ha ka thup nongthep vote jong u snem 2025 ne ki don ki bahaïing hasem kiba la pynrung kyrteng ha ka por jong ka SIR ba la dep, ong ka Rothangpuii.
Hadien ka jingpynkylla, ka jingdon jong ki nongthep vote jong ka Mizoram mynta ka la poi sha ka 8,28,877 ngut, kaba long 94.72 percent na ki palat 8.75 lak ngut ki nongthep vote ba la buh jingthoh ha ka thup nongthep vote ba nyngkong jong u snem 2025.
Ïa ka draft electoral roll yn sa pynmih ha ka 4 tarik u Naitung, hadien kata lah ban aiti ïa ki jingdawa bad jingpyrshah hapdeng ka 5 tarik u Naitung bad ka 4 tarik u Nailar shwa ban pynkhreh ïa ka thup kyrteng ba khatduh.
Kane ka jingpyndam kyrteng kaba bun ïa ki nongthep vote ka wan hapdeng ka jingsngewkhia kaba nang jur halor ka jinglong thikna jong ki thup nongthep vote, khamtam ha ki jaka ba bun ki Chakma ha ka thaiñ Shathie jong ka Mizoram.
Ka Mizo Zirlai Pawl (MZP), kawei na ki seng ki khynnah pule ba donbor tam ha ka jylla, dang shen ka la kynnoh ïa ka jingkiew kaba phylla ha ka jingbun ki nongthep vote bad ka jingmih jong ki 97 tylli ki shnong thymmai ha ki jaka khappud ba bun ki Chakma.
Ka seng ka la aiti ïa ka jingthoh jingkynmaw sha u heh ophisar jong ka tnad jied nongmihkhmat, da kaba pan ïa ka jingpynshisha thymmai ïa ki thup nongthep vote ha ki 195 tylli ki shnong kiba ka kam ba ki la slem bha kiba la shah ktah ha ka jingwan buhai shnong beaiñ.
Katkum ka jingong u president ka MZP u C. Lalremruata, ka jingdon jong ki nongthep vote ha kitei ki 195 tylli ki shnong ka la kiew na ka 43,540 ngut ha u snem 2005 sha ka 96,531 ngut ha u snem 2024.
Katba ka jingbun ki nongthep vote ha ki 98 tylli ki shnong kiba la paw ha baroh ar ki thup thep vote jong u snem 2005 bad 2024 ka la kiew da 31.15 percent na ka 43,540 sha ka 57,103 ngut, ka seng ka la kdew ba sa 39,428 ngut ki nongthep vote mynta ki dei kiba la pynrung kyrteng ha ka thup thep vote jong u snem 2005.
Haba jubab ïa ki jingeh, ka Rothangpuii ka la ong ba ka Election Department ka la khmih bniah ha kaba ïadei bad ki mat ba la wanrah da ka MZP bad ka dang shimkhia ban tohkit ïa kane ka kam.
