U Blei ula sei kyrpang ïa u bah Joy (Rev. James Joy Mohon Nichols Roy) ula long u briew ba khraw tam napdeng ka jaitbynriew Khasi, la kha ïa u Bah Joy ha ka 12 tarik June, 1884, ha ka shnong Mawsiarwait Shella u kpa jong u dei u Khahthan Roy na ka kur Umsong ka Kmie ka Rimai Syiemlieh i dei i pyrsa ksiew jong u Tirot Sing Syiemlieh Syiem ka Hima Khatsawphra (mynta Nongkhlaw). Nyngkong eh u Bah Joy ula don ha ka niam tynrai niam Khasi hadien u Jumai bah ha ri Khasi ha u snem 1897, u la kylla noh sha ka niam Khristan ula long u dkhot jong ka Welsh Mission Presbyterian bad hadien ula pynlong ïa ka Balang U Blei ha ka snem 1902, u Bah Joy mynba u dang pule ha Duff College Kolkata bad katba u dang don ha Duff Hostel uba dang im ha ka jingim bam kwai dih duma dih sikret ha hostel ula iohi paw ïa u briew uba lieh bad uba khuid kala pynlong ïa u ban pyrkhat ba u dei U Blei ba khuid bad u sngewsih ïa u ba u dih sikret. Kane ka jingjia ka la pynlong ïa u ban un pynwit ïa ka jingim ba kynja mynsiem bad ki bym long kpu eiei ïa ka met. Hadien ba u la pynlong ïa ka Balang U Blei ula hikai ïa ki para bangeit ba la kylla kaba mut ban im ka jingim kaba khuid naduh ka mynsiem bad ka met ruh kumjuh ban kiar noh na kaba dih kiad, dih sikret dih duma bad kwai tympew namar kim long kpu eiei ïa ka met. Mynta ka sorkar Meghalaya ka hikai paidbah ban nym dih sikret ne duma la phah pyrta ïa ki khynnah skul ban nym pyndonkam ïa u sikret ne duma ban pyrta NO TOBACCO ha ki surok ne lynti synkien ka sorkar ka khang ban dih sikret hapoh kali ne ha ki jaka paidbah bad hapoh office kane ka la pynbha shibun ïa u paidbah. U Bah Joy ula shim bynta ha ka saiñ pyrthei naduh u snem 1921 por ba dang synshar ki phareng ïa ka Ri India, u la jop MLA lynter hapoh ka sorkar Assam ula long Minister naduh u snem 1927 bad ula long u Member ka Constituent Assembly ba thaw ïa ka Constitution ka Ri India la jied ïa u da ka Sorkar Assam kum uwei u riewkhraw ka Assam, ula pynrung ïa ka Sixth Schedule ha ka constitution ka ri India ban ïada ïa ki riewlum ha NE India. La tip ruh ïa u kum u Kpa ka Sixth Schedule ba wanrah ïa ki Autonomous District Council kum ka KHADC bad kiwei kiwei ha North East India. U Rev. J. J. M. Nichols Roy ula long shisha u briew uba khraw tam napdeng ki Khasi ba U Blei hi u la pynmih ban ïada ha ka Ri Khasi lyngba ka Sixth Schedule, la dei ban tei u mot shirynieng ha thain khyndai lad bad sah kynmaw ïa u riew khraw. U Bah Joy ula ïathoh shongkurim bad ka mem na Ri America ka Sister Nora Evelyn Nichols ha ka 17 tarik August, 1907 bad ila khlad noh ha ka shi tarik November, 1959.
Dr. Boss L. Marthong
New Nongstoiñ
