Ka Nongnah ha South West Khasi Hills ka long ka hnong kaba itynnad bha haba shim ïa ka dur ka dar ba paw kum ka shnong ka Jylla Meghalaya. Ka jingitynnad j ong ka ym dei ba pynitynnad u briew, ka dei ka jingai bad ohshrong ka Mei mariang ne kumba opng noh ka dei kata ka Natural Beauty kaba la pynlong da u nong-thaw nongpynlong ïa ka Mei mariang. ïa ka Nongnah la ker la jan baroh sawdong da ki riat (cliff) lait noh phang shathie la ker da u lum ïawpaw.
Ha ki them ki lyhuh jong ka la tap da ki khlaw bah Diengmet kiba rben. Ki Nongnah ki leit rep leit riang ha ki jaka them sharing pohriat. Ha ki khlaw jong ka ki don ki sim ki doh kum ki Kyrngem, ki Langdikhur, ki khlieng ki kbeit, ki Jalyeit, ki paitpuraw, ki kynterlop, ki Jalakob ki Jyllop, ki simsong bad bun jait ki jait sim kiba bun ki bym lah ban ai kyrteng. Ki don de ki mrad khlaw kum ki shrieh, ki tngaw, ki skei, ki khiat, ki niangkhlaw, ki diengkhit, ki Brai, ki Phyllad bad kiwei kiwei.
La nang khring itynnad de ïa ka da ka jingdon ki kshaid ha ki wahduid kiba noh rymphum khamtam ha ka por lyiur. Ka Nongnah ka long kum ka miej (Table land) haba peit ïa ki sawdong pud jong ka. Ka don de ka pung sum shrieh kaba phylla shisha ne kaba la tip kum ka Natural Swim-ming pool ha shiteng riat ka la khring ïa ki nongjngoh kai ban wan ïuhkjat hapoh Nongnah.
Kawei pat ka jingdon ka Krem Mawtynhiang halor u lum ïawpaw kaba la khring shuh shuh ïa ki Tourist na jan bad najngai.Ka don de ka jingkieng jri (Ladder) harum shnong Thangrai kaba ka Meimariang ka ai.ka long kaei kaei kaba la nang khring shuh shuh ïa ki nongwan jngohkai ïa ka shnong Nongnah. Ka Nongnah ka long ka shnong kaba u Blei nongthaw nongpynlong ula kyrkhu ïa ka kum ka shnong kaba rit na kiwei kiwei ki shnong ha ka jingitynnad ka dur ka dar na ka scenery jong ka.
Ka don de ka jaka ïaleh thma bad u phareng kaba la tip kum ka Tynrong rit Bamon. Ka jingitynnad jong ka Nongnah ka long shisha kaba pynkmen pynsngewbha ïa ki briew ka thain Ri War sepngi bad ïa ka South West Khasi Hills. Ha Nongnah u don de u jait jingthung na u Tangniangriang (Pitcher plant) uba mih kynrei bha khamtam sharuk ka shnong Thangrai. Ka jinglong ki lum ki wah bad ka jingdon kine kiei kiei ka pynlong ïa ka Nongnah ka shnong kaba itynnad shibun ha ka jingpynlong ka Mei mariang. Ka Scenery jong ka ka la syriem ïa ka miej. Kumta la tip ïa kum ka Table Land.
C. B. Iawphniaw
