Nongpoh, Naitung 02
Ka Khasi Students’ Union (KSU) North Khasi Hills District Unit, kala pynskhem biang ïa ka jingpyrshah jur jong ka ban tei ïa ki dukan bam lane kita ki Food Court hapoh ka Facilitation Centre kaba don ha Umling, da kaba ong ba katei ka jaka ka dei ban long tang kum ka Entry Point katkum ka Meghalaya Residents Safety and Security Act (MRSSA).
Haba kren sha ki lad pathai khubor hadien ka jingïakynduh ïa u Deputy Commissioner ka Ri Bhoi, u Dr. Abhishek Saini ha ka sngi Palei, u President ka KSU North Khasi Hills District Unit, samla Ferdynald Kharkamni u la ong ba hadien ka jingkynduh bad u Tourism Officer ka Ri Bhoi ha ka 30 tarik Jylliew bad ka jingjurip ïa ka Facilitation Centre ryngkat bad ki nongïalam ka KSU Central Executive Council, ka seng kala lap ba ka Sorkar Jylla ka thmu ban pynkylla ïa katei ka jaka sha ki dukan bam.
U samla Ferdynald u la ong ba ka seng ka pyrshah jur ïa katei ka jingthmu namar ba naduh kaba sdang, la thaw ïa ka Facilitation Centre ban long kum ka Entry Point katkum ka ain MRSSA, ka aiñ kaba mih na ka jingïakhih Inner Line Permit (ILP) ha ki snem 2013-14 bad kaba la pynlong aiñ ha u snem 2016.
U la pynkynmaw ba hadien ka jingwad jaka kaba biang ha u snem 2019, la pyntip sha ka KSU ba ka Sorkar kala ithuh nyngkong ïa kumba 15 akar ka jaka ha 19 Mer ban pyntrei ïa kane ka projek. Katkum ka jingong jong u, ka jingthmu jong ka Sorkar ha kato ka por ka long ban tei ïa ka Facilitation Centre kaba heh ban pynlait na ka jingdheng kali bad ruh ban pynsuk ïa ki briew kiba wan sha ka Jylla.
Hynrei, u la ong ba ym shym la lah ban ïoh ïa katei ka 15 akar ka jaka namar ki jingeh ha ka jinglong lum bad sharing katei ka jaka. Hadien kata, ka Sorkar kala ai ïa kumba 2 akar ka jaka ha Umling kaba dei jong ka tnad Transport, ha kaba ym pat don satia kano-kano ka jingtei ha kato ka por. U la bynrap ruh ba hadien, ka tnad Transport kala pyndonkam shibynta jong katei ka jaka ban buh ïa ka Weigh Bridge.
U samla Ferdynald u la ong ruh ba ha ka jingplie paidbah ïa ka Facilitation Centre ha u bnai Nohprah jong u snem 2020 da u Symbud Myntri Rangbah ka Jylla, u Bah Prestone Tynsong, ka Sorkar kala pynshai sha ka seng ba katei ka jaka kan kynthup ïa bun tylli ki tnad Sorkar kum ka Tourism, ka Labour, ka Infiltration bad kiwei-kiwei nalor ka jaka bam.
“Ha ka por ba ngi ïohsngew ïa katei, ngi pdiang ïa ka jingthmu jong ka Sorkar namar ba ka thong ba kongsan ka long ban pynïeng ïa ka Entry Point. Hynrei mynta pat, kaba ngi ïohi ka long ba katei ka jaka la pynkylla noh na ka bynta ki dukan bam. Kane kam lah ban pdiang namar ba ngi la duh lypa ïa ka jaka kaba heh 15 akar kaba la thmu nyngkong na ka bynta kane ka projek. Lada tei ïa ki dukan hapoh kane ka jaka kaba rit tang 2 akar, kan wanrah shisha ïa ka jingdheng kali kaba jur lada sdang pyntreikam ïa ka Entry Point,” u la ong. U la ong ba ka seng kala ai jingmut sha ka Sorkar ba ka dei ban pynheh shuh shuh ïa katei ka jaka jong ka Facilitation Centre.
U samla Ferdynald u la pynshai ba ka seng kam pyrshah satia ïa ka jingwan kita ki dukan bam lane ki food court ha kiwei pat ki jaka jong ka district bad kan pdiang sngewbha ïa kum kita ki projek, khamtam na ki kompani trai Jylla. Hynrei, u la ong ba ka jaka ha Umling ka dei tang ma ka kaba biang tam ban long kum ka Entry Point bad ym dei ban pyndonkam ïa ka bynta kiwei pat ki kam kum ki dukan bam.
U la pynpaw ruh ïa ka jingsngewkhia hadien ka jingïalang, da kaba ong ba u Deputy Commissioner u la kyrpad ïa ka seng ban ym pynthut ïa ki kam pynroi ne ki lad ai kam ai jam. Hynrei, u samla Ferdynald u la ong ba ym dei ban pynkylla ïa kane ka mat kaba kongsan sha ka jingkren tang halor ka ïohkam ïohjam.
“Ngi sngewthuh bha ïa ka jingdonkam jong ka ïohkam ïohjam. Ka KSU kala dawa ruh ba ka jingthungkam hapoh ka district ka dei ban long kaba shai bad kaba khuid. Ngi la ai jingmut ruh ba dei ban buh da ki camera ha ki interview thepkam thepjam na ka bynta ki kam Grade-I, Grade-II bad Grade-III khnang ban don ka jingkhuid jingsuba. Kumta kam dei satia ban pynpaw ba ka KSU ka pyrshah ïa ka ïohkam ïohjam,” u la ong.
U la bynrap shuh shuh da kaba kylli, “Lada ka Sorkar ka long kaba sngewkhia shisha halor ka ïohkam ïohjam, shaei ki 32 ngut ki Data Entry Operator (DEO) bad ki Grade-IV Helpers kiba la thung ha ka por ba plie paidbah ïa ka Facilitation Centre ha u snem 2020 ki don mynta?” U la ong ba kane ka mat kam dei shaphang ban thaw kam thymmai lyngba ka dukan bam, hynrei ka long ban pyntreikam ïa ka Facilitation Centre katkum ka jingthmu bad ka jingmut ka jongka naduh kaba nyngkong.
U samla Ferdynald u la maham ruh ba lada pynkylla ïa ka Entry Point sha ka dukan, kan pynpulom bad pynsyrwa ïa ki bun tylli ki snem jong ka jingïakhih bad jingïaleh jong ka KSU bad kiwei pat ki seng kiba dawa ban pyrkhing ïa ka jingwan rung ki briew nabar sha ka jylla Meghalaya.
Ha ka jingïalang mynta ka sngi kaba la wan ban ïadonlang da u Superintendent of Police ka Ri Bhoi, u Block Development Officer ka Umling C&RD Block, u District Tourist Officer lem bad u kontraktor ba pyntrei ïa katei ka projek, ka KSU kala pynskhem biang ïa ka rai ban pynsangeh ïa ka jingtei ïa ki dukan ha Facilitation Centre bad ka seng kan ym ailad ban bteng ïa ka kam tad haduh ba ka Sorkar kan pynthikna ba katei ka jaka kan long katkum ka jingthmu ba nyngkong kum ka Facilitation Centre bad Entry Point.
Halor ka jingkynthoh ba ka seng ka pyrshah ïa ki briew kiba wan nabar ka Jylla, utei u nongïalam u la ong ba ka KSU kam pyrshah ïa ka jingwan ki briew nabar sha Jylla. U la ong ba ka seng ka pdiang sngewbha ïa ki nongjngohkai pyrthei, ki samla pule, ki ophisar bad ki nongtrei kiba ka jylla ka donkam, tangba ki dei ban wan da kaba shai katkum ka aiñ ryngkat ki kot ki sla kiba biang.
U la ong ruh ba lada pyntreikam pura ïa ka Entry Point, kan pynkhlaiñ ïa ka jylla ban peitngor bad tehlakam ïa ka jingwan rung beaiñ ki briew nabar bad ban khanglad ruh ïa ka jingwan rung ki jingsniew kum u drok bad kiwei kiwei ki kam be-aiñ sha Jylla.
“Ka jingthmu jong ngi naduh kaba sdang ka long ban pyrkhing ïa ka jingwan rung ki briew nabar bad ban talasi ïa ki kali kiba kit ïa ki jingdih buaid bad kiwei kiwei ki mar be-aiñ. Hynrei mynta pat, ïa kane ka mat la pynkylla noh tang ha ka kyrteng jong ka ïohkam ïohjam,” u la ong.
U samla Ferdynald u la ïathuh ruh ba u DC u la pan por ban rah ïa kane ka mat sha ka Sorkar. Hynrei, u la ong ba mynta ka jubab kam shong shuh ha u Deputy Commissioner hynrei ha ka Sorkar Jylla.
“Ka Sorkar ka dei ban kren shai. Ka dei ban rai la katei ka jaka kan long ka dukan bam ne ka Facilitation Centre. Lada ka jied ïa ka dukan bam, kan pyni ba kam shimkhia ïa kane ka kam kaba kongsan. Hynrei lada ka long kaba shimkhia shisha, ka dei ban pyndam noh mardor ïa ka tender jong ka dukan bam bad ban pynthikna ba baroh ki jingtei kin long tang na ka bynta ka Facilitation Centre. Haduh ba ka Sorkar kan ai ïa ka jubab kaba shai, ka KSU kan ïai pynsangeh ïa katei ka jingtei,” u la bynrap.
