Shillong, Naitung 02
U MDC ka Voice of the People Party (VPP) na Mawkynrew Konsti-twensi, u Bah Seiborlang Warbah, uba dei ruh u EM ka KHADC, u la pyntip ba ka jingwanrah ka EC ha ka dorbar ba dangshu dep ïa ka Amendment bill, ka long tang ban pynbeit na ka bynta ka jingai pathar ïa ki jaka.
Ïa kane u Bah Sei-borlang u la jubab, haba kylli ki lad pathai khubor, halor ka jingkynnoh ba ka KHADC ka pyrshang ban pynduh bor ïa ki Rangbah Shnong.
U Bah Seiborlang u la ong, ba ki kompeni ba heh bad ki heh spah, ki lah ban thied ïa ki jaka kiba heh katno katno ruh. Bad ka jingdon kine ki jaka Raid kaba la buh da ki longshuwa manshuwa, ka long ba ki kup shiliang ki sem shiliang, kin ïoh jaka puta ha kine ki jaka, hynrei ka jinglaitlan palat ka jingïoh jaka mynta ki por ka jur palat.
U la ong ba ka EC ka KHADC, ka la shim ïa ka sienjam na ka bynta kata bad khem da ktah ïa ka bor ka iktiar ha kaba ïadei bad ka kam jong ki nongïalam raid ne ki nongïalam shnong.
“Ka jingwanrah ka EC ïa kane ka Amendment bill ha ka dorbar kam dei ka jingpyrshah ne pynduh bor ïa ki Rangbah Shnong hynrei kadei ban ïada na ka jingai pathar ïa ki jaka ki puta sha ki briew shimet ne sha ki kompeni,” la ong u Bah Seiborlang.
U la ong ruh ba lada kam don ka jingpynbeit haba ïadei bad kane ka bynta, ka mut kino-kino ki kompeni heh spah ne ki heh spah, ki lah beit ban thied ïa ki lumbah ki lumsan ruh.
“Lada ym don ka jingïada, ki pateng ban wan ngi thikna ba kin nym ïoh shuh wat tang ban shna kawei ka ïing ruh. Kumta ka jingshim rai ka EC haba ïadei bad ka Amendment bill ha dorbar District Council, ka long ha kata ka nongrim ban ïada ïa ka jingdie pathar ki jaka bad khlem da ktah ïa ka bor ka iktiar ki rangbah shnong ne ka kam ki nongïalam ka Raid,” u la bynrap.
