Shillong, Naitung 02
U Bah Banteidor Lyngdoh uba dei u MLA ka Mawkynrew ha ka sngi Palei u la kyntu ïa ka Sorkar Jylla ba kan khang shwa shipor ïa ka jingwanrah ïa ki sniang nabar ka Jylla, haba kdew ïa ka jingpur ka khlam bad ka jinghiar dor ki sniang trai jylla kaba la ktah jur ïa ki nongri jingri.
U Bah Banteidor u la pynpaw ïa kane haba kren sha ki lad pathai khubor hadien ba u la lamkhmat ha ka jingleit ïakynduh jong ka Federation of Piggery Farmers of Meghalaya ïa u Myntri ba khmih ïa ka tnad Animal Husbandry and Veterinary Bah Sanbor Shullai ha ka sngi Palei ban pynpaw ïa ki jingeh jong ki nongri sniang ka Jylla kaba ki la ïakynduh na ka jingwan lynshop ka khlam, kaba la ktah lut ha baroh ki liang.
Haba kren sha ki lad pathai khubor u Bah Banteidor u la ïathuh ba ka jingïakynduh ka la long kaba sngewtynnad ha kaba u Myntri u la ai ka jingkular ha u ba un sa ïakren ïa kane ka kam bad u Myntri Rangbah hapoh ka artaïew.
U Bah Banteidor u la ong, “Nga ai khublei ïa u Myntri namar kane ka jingïalang ka long kaba seisoh. Ngi la ïakren ïa shibun ki kam ba ïadei bad ki jingeh ba ïakynduh da ki nongrep jong ngi khamtam kito kiba ri jingri”.
Shuh shuh u la ïathuh ba ka jingïakren, ba la pynlong ha ka jingïadonlang ki ophisar ka tnad, ka long kaba bniah bha bad kaba sngewhun haba khmih ïa ka jingkhia jong ka jinglong jingman.
“Kane ka dei ka kam kaba sngewkhia jur bha namar ka ktah ïa ka jingïap ki sniang bad ktah ïa ki nongri jingri, kaba la ktah jur ruh ïa ka dor jong ki sniang ha kylleng ki jaka ka Jylla,” u la ong.
Katkum ka jingong jong u, ki nongri sniang kiba ju die ïa u sniang baroh shikatta ha ka dor kaba long T.17,000 haduh T.18000 mynta ki hap ban die tang T.11000 lane T.10,000 namar ka jingpur ka khlam kaba don jingïadei bad ki sniang ba wanrah na shabar ka Jylla.
U Bah Banteidor u la pyntip ruh ba u Myntri u la kular ba un sa ïakren ïa kane ka kam bad ka Sorkar halor ka jingdonkam ban khang shwa shipor ïa ka jingwan pynpoi sniang na shabar bad ban pynmih ïa ka jingpynbna ban khang ïa ka jingnang pur jong ka khlam bad jingïap ki sniang.
