Jowai, Naitung 02
Ka lehniam Behdienkhlam ba saw sngi lynter ba ju pynlong shisien shisnem da ki jaidbynriew Pnar ba dang bat dang ksoh ïa ka niam tynrai (Niamtre) kan sdang ha ka 6 tarik haduh 9 tarik Naitung.
Ïa kane la pynbna da u President ka Seinraij Jowai Ma Hercules Toi bad Dolloi ka Elaka Jowai Ma Puramon Kynjing ha ka jingdonlang u General Secretary ka Seiñraij Ma Arwotki Sumer bad Assistant General Secretary Seinraij Jowai Wyr-ai-ki Kharbuki haba kren bad ki lad pathai khubor ha ophis ka Seinraij Jowai ha ka 2 tarik Naitung.
U President Seinraij Jowai Hercules Toi u la khot sngewbha ïa baroh ki paidbah sha ka jinglehkmen Shad Behdienkhlam na bynta ban ïoh ka jingkyrkhu, ka jingkoit jingkhiah, ka roi ka par, ka jingdap jingbiang, ka jingkiew ha ka kamai kajih, ka pule puthi bad ki jingkyrkhu ha ki liang baroh.
U Dolloi Puramon Kynjing u la ai khublei ïa baroh ki khun ka Seinraij. U la ong ka jingpyndep ïa ka Behdieñkhlam kan wanrah ïa ka bha ka miat ha baroh ki liang, u la kyntu ïa ki paidbah ba kin pynduna ban wanrah ïa ki kali ki motor khnang ban lait na ka jingdheng kali.
Katba na ka liang u General Secretary Arwotki Sumer u la pyntip ba ha ka sngi pynkut kata ha ka 9 tarik Naitung ka Seinraij Jowai kala khot sngewbha ïa u Myntri Rangbah ka Assam u Himanta Biswa Sarma, bad ba ka jingkhot ïa u la khmih lynti ba kan wanrah ka jingieid bad ka jingburom markylliang hapdeng ki ar Jylla ka Meghalaya bad Assam.
Halor ka jingpynkhreh ïa ka rukom ïaid jong ki kali, u Wyraiki Kharbukhi u la pyntip, ïa ki kiba wan na Shillong ban leit sha ka thaiñ War Jaiñtia kin hap ïaid na ka surok By-Pass thymmai na Khliehtyrshi ban mih sha Tre Iongriang, ki kali kiba leit sha ka liang Ladthadlaboh kin ïaid na Riatmoolaiñ (GHM). Katba kiba wan na Jowai kin ïaid na ka surok Shahtngit ban mih sha Riatsasim.
Na ka bynta ki jaka pynïeng kali ha ka sngi khatduh ka 9 tarik Naitung, ki paidbah ki lah ban pynïeng kali ha madan Jrisalein, madan Seinraij kaba ha Iawmusiang, madan Ryngkaw kaba ha Tpep Pale katba ïa ki nongshah khot sngewbha la pynkhreh ban pynïeng kali ha Parking Lot kaba ha Mooliksoo.
