Nongstoiñ, Naitung 02
Ka Hima Nongstoiñ kala mih shakhmat ban pynpaw ïa ka jingsngewdiaw kaba jur ha kaba kala ong ba na ka liang ka Hima naduh ba ka Sorkar lyngba ka tnad District Council Affairs kala pynmih ïa ka hukum ban khang ïa ki khyrdop, kumta haduh mynta kam shym la ai kano-kano ka hukum ïano-ïano ban buh ïa ka khyrdop lum musur.
Kane ka jingpynpaw ka Hima ka la long hadien bala ïohi ha ki lad pathai khubor, lyngba ka All Meghalaya Labour Association Mawshynrut Circle kaba la kren halor ka jingdon ki khyrdop lum musur, ha kaba ki la pynpaw ba ki don lai tylli ki khyrdop lum khajna jong ki Hima kiba la pynïeng ha ka surok Riangdo-Athiabari ha West Khasi Hills bad kawei na kita ka dei jong ka Hima Nongstoiñ.
Haba kren sha u nongthoh khubor, u Bah Apsharailang Syiem Secretary Dorbar Syiem Hima Nongstoiñ u la ong, ka Hima Nongstoiñ ka kwah ban pynshai kdar ba naduh ka snem 2022 hadien ba ka Sorkar lyngba ka tnad District Council Affairs, kala pynmih hukum ba ki Hima kim lah shuh ban buh ïa kino kino ki jaka lum musur ha ki ‘state highway’ lane ki ‘national highway’ na ka liang ka Hima kala pynsangeh mardor ban buh ïa ki jaka lum musur.
U Bah Syiem u la ong ruh ba ka Hima haduh mynta kam shym la ai hukum shuh ban lilam ïa ki jaka lum musur ïano ïano bad lada ka don kum kata ka jingleh lane ka jingshim kabu jongno-jongno ha ka miet ka ïong, ka Hima ka kyntu ïa katei ka seng khamtam ba lada ki lap ba ki don ki briew kiba shimkabu ha ka kyrteng ka Hima Nongstoiñ ki dei ban kem mardor ïa kita bad ki dei ban ujor hakhmat u Syiem bad ka dorbar ha kaba ka ophis jong u Syiem kan ïoh ban leh ïa kaba donkam.
U la ong ruh ba ka Hima ka maham tyngeh ba lada don kino-kino ki briew kiba leh lane shim kabu bad khrong beaiñ ïa ki kali kit jingkit kiba dei ïaid ha u pud u sam ka Hima Nongstoiñ, ki dei ban ujor lane ban kem ïa ki.
Shuh shuh u la ïathuh ruh ba halor kane na ka liang ka Hima kala dep ban buh ruh ïa ka FIR la katto katne por bad ka Hima ka kyntu ïa ka tnad pulit ba kan shim kam halor kane ïa kaba ka Hima kala dep ban buh ïa ka FIR lada don kino kino kiba khrong beaiñ kin ngat ha ka jingshah pynshitom ha ka aiñ.
