Shillong, Naitung 02
Ka Hynñiewtrep Inte-grated Territorial Organi-sation (HITO) ka la leit ban buh da ka jingthoh sha ka ophis Meghalaya State Pollution Control Board (MSPCB) haba ïadei ka jingjur ka jingmih pui-pui na kawei ka karkhana pynmih Dew-bilat kaba don ha Umiam Ri-Bhoi District.
Haba kren sha ki nongthoh khubor u Bah Donbok Dkhar President ka HITO u la ïathuh ba ha kine ki sngi ka seng ka la ïoh ki jingujor na ki paidbah nongshong shnong jong ka thaiñ haba ïadei ka jingher ki pui-pui na ka R N B Cement Pvt. Ltd. kaba la buh jingma ïa ki nongshong shnong jong ka thaiñ.
Shuh-shuh u la ïathuh ba na ka liang ka MSPCB ka la dep ban phah jingthoh sha ki karkhana pynmih Cement kiba don ha Umiam Ri-Bhoi District ba ki dei ban bud ïa ki kyndon ba ka thaiñ kan lait na ki jingma.
“Ka jingshimkhia ka HITO haba ïadei bad kane ka dei ba ngim kwah ba ka Umiam kan ïoh ïa ka nam ka ban long kum ka Byrnihat” la ong u Bah Donbok.
U la ong ba ka Meghalaya mynta kumba 30% ka la dei ka jaka ba jaboh, lada phai kum ka East Jaiñtia Hills, ka Ri-Bhoi bad katto katne kiwei pat ki jaka ba ym lah shuh ban teh kyndon haba ïadei ka jingjaboh ka lyer.
U Bah Donbok u la kynnoh ba kane baroh ka dei namar ka jingkheiñ sting ka Sorkar Jylla ba kam lah ban teh kyndon ïa ki kompeni kiba wan ban buh karkhana pynmih Dewbilat hapoh ka Jylla, kumta ka HITO ka la kyntu ïa ka MSPCB ban pynlong ka jingjurip ïa ki karkhana ba don ha Umiam Ri Bhoi District bad lada kim lah ban pynbiang kumba la bthah ka tnad ka dei ban khang khyrdep shisyndon ïa kitei ki karkhana.
