Imphal, Naitung:
Ki la don kumba 15 tylli ki ïing kiba la shah pyn kylla dpei hadien ba la kynnoh ba ki riew sniew ki bym shym la lah ban ithuh ki la thang ïa ka shnong Phaimol Kuki ha ka distrik Kamjong jong ka Manipur ha ka 1 tarik u Naitung, katba ka jingbteng jong ka kam thombor ka la ïaid shakhmat halor ka jingthmu ban thombor pyrshah ïa ka shnong Tangkhul ha kaba kane ka la shah khanglad noh na ka jingpyntreikam jong ki bor pahara.
Katkum ka jingtip ba la ïoh da ki bor sorkar, katei ka jingjia ka la jia ha ka por kumba 12:30 baje eiei mynsngi ha ka shnong Phaimol, kaba don kumba 45 km shaphang Shatei-Mihngi na Chassad Police Station hajan u Indo-Myanmar Border Pillar No. 113.
Ki heh sorkar ki la ïathuh ba ki nongshong shnong ki la dep ban pynkynriah shnong noh ïa ki briew ka Phaimol namar ka jinglong jingman khnang ban don ha ka jingshngaiñ bad ki la leit rieh tngen shipor ha ka shnong Aishi, ha kaba ka don ka ktem jong ki shipai 11 Assam Rifles. Kumta ym shym la don kano kano ka jingjia ba sngewsih ne mynsaw. Baroh ki 15 tylli ki ïing kiba don ha katei ka shnong ki la shah bam duh ha ka jingpluh ding, katba ka ïingmane shnong pat kam shym la shah ktah satia.
Ha kaba la suba ba ka dei ka jingleh pynrem, la kynnoh ba kawei pat ka kynhun ki riew sniew kiba la kieng atiar, ki la pyrshang ban thang ïa ka shnong Shangkhalok Tangkhul, kaba don hajan u Indo-Myanmar Border Pillar No. 101, ha ka por kumba 1:45 baje eiei nohphai sngi ha kane kajuh ka sngi.
Ki bor pahara ki la tuklar mardor, ha kaba la khanglad ïa ka shnong ban shah pynjot pura. Hynrei katto katne ki ïing rit kiba la shna da ki dieng kiba dei jong ki nongphetwir na Myanmar bad katto katne ki ïing jong ki dkhot jong ka jaitbynriew Tangkhul ki la ingkhong ha ka ding. Nalor kata, hynñiew tylli ki ïing Tangkhul ki la shah pynjulor shi bynta hynrei ki dang sah, katba hynñiew haduh phra tylli ki ïing ki sah khlem shah ktah.
Ki heh sorkar ki la pyntip ruh ba hynñiew tylli ki ïing ha Huimine Thana, ka jaka sah ki Tangkhul kaba don hapdeng ka Shangkhalok bad Phaikoh, ki la shah thang lut.
Ym shym la don kano kano ka jingjia ba sngewsih ne mynsaw briew ha kino kino ki jingjia.
Ki pulit ki la ïathuh ba la buh jingmudui mukotduma ha kaba ïadei bad baroh ar tylli ki jingjia, bad la sdang ïa ka jingtohkit kaba bniah ban lap ïa kiba donkti bad ban pynthikna ïa ki jingjia kiba don ha kine ki jingshah thombor.
