Shillong, Naitung 03:
Hapdeng ka jingkyrduh kam ba ki samla ki ïakynduh hynrei kawei ka puron jong ki phlim khasi ka Daphilin Mary Lyngdoh Nonglait kaba baroh ki tip kum ka Moi ka la long kaba trei shitom namar na ka kam ak phlim, ka dei ruh ka nongsam khaw rashon bad shet cake ha Tiehsaw, Nongstoiñ kaba ka shong ka sah.
Ka Daphilin Mary Lyngdoh Nonglait ka dei kaba ak kum ka puron lamkhmat ha ka phlim Molin kaban sa pyni paidbah ha Bijou cinema Shillong naduh ka 10 tarik Naitung 2026 man ka sngi kata ha ka por 11:30 mynstep, 2:00 baje nohphai sngi, 5:00 baje janmiet bad 7:30 mynmiet.
Ïa kane ka phlim Molin la pynmih bad shna da u Bah Emdor Suchiang ba la ak da u Welborn Mynsong.
Haba ïakren bad ka Daphi ka la ïathuh ba kane ka jingsam khraw rashon ka la sdang naduh u snem 2019 da kaba ïa thep vote da ki nongshong shnong hynrei ka la jop beit man u snem namar ki paidbah ki ïohi ïa ka jingbeit ka jingtreikam.
Shuh shuh ka la ïathuh ba ka jingïoh lad ban ak phlim namar kane ka kam sam khaw rashon ka dei shi taïew ha ka shi bnai.
“Nga la sngewkyndeh shisha ka mynsiem namar ka phlim Molin ka dei kaba nyngkong ban pyni ha Bijou cinema Shillong” ka la ong.
Ka la ïathuh ba ka la rung ha ka kam ak phlim ka dei naduh ba ka la sdang ïa ki phlim lyngkot ha ka Youtube Channel ‘Shaphrang ngan tur’, hynrei da ka jingkyrshan u lok ka la lah ban bteng ïa ki kam ak phlim bad bteng biang ruh ïa ka jingpule.
Shuh shuh ka la pyntip ba kam ju mih shuh ha Youtube namar ka la ak beit ban pynmih ki phlim lyngkot ha Hello Meghalaya.
