Ka jingsngew niam ka pynjot ïa ka jaitbynriew. Ka jingsngew sarong jong ki balang, kawei ka ong ka balang jongngi kaba hok kaba ngeit ïa ka jinghikai ka ktien u Blei.
Kawei ka ong ka balang jongngi kaba bud ïa ka jinghikai u Jisu. Kawei ka sngew ka balang jongngi kaba hiar pateng la pateng na ki Apostol bad ki riewkhuid jong u Blei. Kawei ka ong ka balang jong ngi kaba la seng naduh u Petros Bakhuid bad kaba dang ïaineh skhem haduh kine ki sngi. Kawei ka ong ka balang jongngi ka long skhem ha ka nongrim ka rukom hikai ka balang pateng la pateng naduh ki por mynbarim. Bun kiba pynksan ha la ka jingngeit.
Hynrei ka ktien u Blei ka ong, namar baroh ki la leh pop bad ki la duh lehnohei ïa ka burom ka jong u Blei (Rom 3 : 23).
Shuh shuh ka ong ym don uba hok em, ym don uwei ruh, ym don uba shemphang ym don keiñ uba wad ïa u Blei (Rom 3 : 10 – 11). Te lada phi pule bha ïa ka Baibl ka jingsngew pher niam ka duh noh, namar ka Baibl kam ju pynksan ïa ka jinglong niam. Ka don tang ka jingsuk bad u Blei. Bad ym don ka jingieit niam khleh biej. Ka jingsngew niam ka pynjot ïa ka jaitbynriew.
C. B. Iawphniaw
