New Delhi, Naitung:
Ka seng AAP ha ka lah sngi U Blei ka la pynlong ïa ka jingïakhih ha LNJP Hospital halor ka jingkynnoh ba ka la don ka jingthok pisa kaba T.650 klur ha ka sorkar Delhi, ha kaba ka la kylli jingkylli ïa ka Myntri Rangbah ka jylla ka Rekha Gupta halor ka jingkynnoh ba u nongshah kynnoh ba kongsan u la phet rieh sha Germany.
U President ka AAP Delhi u Saurabh Bharadwaj u la kynnoh ba u Rajiv Rangeela u khlem shah kem ha ka kynhun Anti-Corruption Branch (ACB) haduh shibnai bad la ailad ïa u ban mih na kane ka ri. “Ka la don ka jingklop ha ka tnat ka koit ka khiah kaba la kot sha ka T. 650 klur ha ka nongbah. Ïa uba shah kynnoh uba dei u kongsan ym shym la kem satia da ka ACB haduh shibnai, bad la ailad ïa u ban phet rieh sha Germany” ong u Bharadwaj.
U la kynnoh ba ka Dr Vatsala Agrawal ka la shah thung kum ka khlieh jong ka tnad ka koit ka khiah jong ka sorkar Delhi wat hapdeng ka jingtohkit kaba pyrkhing bha bad da kaba ïaid lait ïa ki heh ophisar.
Ki MLA ka AAP, kiba kynthup ïa u Sanjeev Jha bad u Kuldeep Kumar, ki la ïasnohkti lang ha katei ka jingïakhih. U Jha u la kynnoh ba la ailad ïa u kontraktor uba donkti ha katei ka kam ban phet krad, katba ka ACB ka la buh jingkheiñ ïa ka jingkynnoh thok kaba la kot sha ka T.650 klur.
Halor kitei ki jingkynnoh, u nongaiktien ka BJP na Delhi, u Praveen Shankar Kapoor u la ong ba ka Agrawal ka la khlieh ïa lai tylli ki Hospital bad kawei ka Medical Body ha ka por jong ka sorkar AAP kaba la dep. U la ong ba ka jingthung ïa ka ka long katkum ka jinglong rangbah bad ba ka sorkar Delhi kaba mynta ka la hukum ban tohkit da ka ACB tang shu paw ki jingkynnoh, kaba la pynlong ïa ka ban shah kem. Ka ACB ka dang tohkit ïa kane ka jingkynnoh thok.
