Lucknow, Risaw:
Katba dang ap ïa ka ilekshon sha ka ïing dorbar thaw-aiñ jong ka Uttar Pradesh ka ban long ha u snem 2027, u heh ka AIMIM u Asaduddin Owaisi u la ong ba dei ban pynkylla ïa ka kyrteng jong ka Samajwadi Party sha ka ‘Samajwadi Yadav Parivar’, da kaba thmu ïa u heh jong ka seng u Akhilesh Yadav halor ka jingmihkhmat jong ki nongïalam Muslim ha ki konstitwensi kum ka Firozabah.
“Akhilesh Yadav, ka kyrteng jong ka seng jong phi ruh, phi la dei ban pynkylla noh na ka Samajwadi sha ka Samajwadi Yadav Parivar”, la ong u Owaisi haba kren ha ka jingïalang ha Kairana district jong ka Uttar Pradesh ha ka Sngi U Blei.
Shuh shuh ruh u la ong “Ka la don ka por ba uwei u jaitbynriew Muslim, u ju jop lynter-tait na ka konstitwensi Azamgarh. Mynta u hynmen jong u Akhilesh u la long u MP na katei hi ka jaka. Ka la don ka por ba u MP Muslim u la long MP na Firozabad. Mynta ki bahaïing jong u Akhilesh ki la long MP na katei ruh ka thaiñ,” u la bynrap.
Shuh shuh, U Owaisi, u la kynthoh ïa U Akhilesh Yadav, halor ka jingkulmar ha Muzaffarnagar, da kaba kynnoh ba kumba 50,000 ngut ki briew, ki la shah pynkynriah na ki ïing ki sem jong ki, ha ka por ba don ka jingïakynad, ha ka por ba ka Samajwadi Party, ka dang synshar ha Uttar Pradesh.
“Kumta to ïathuh ïa nga, ki paidbah ka Muzaffarnagar bad Kairana, hato kam dei kaba shisha ba ha ka por ba u Akhilesh u dang long u Myntri Rangbah ka Jylla, ha kane ka jaka hi, phi, ngi, ka pyrthei ngi la ïohi da la ki jong ki khmat kumno ki jingkulmar ha Muzaffarnagar ki la jia. 50,000 ngut ki briew ki la shah beh na la ki ïing ki sem,” u la ong.
U heh jong ka AIMIM u la kynnoh shuh shuh ba ki khynnah kynthei ki la shah thombor bad ki khynnah ki la sah khunswet ha ka por ba jia ka jingkulmar, katba ki longïing kiba la sah ha ki shnong jong ki da ki pateng ki pateng ki la sah khlem ïing khlem sem.
“Ki khynnah kynthei ki la shah thombor, bad ki khynnah ki la kylla long ki khunswet kiba la shong ha ka jaka jong ki ha ki shnong jong ki la 100-100 snem. Ki la sah khlem ïing khlem sem,” u la ong.
“Ka dei ka sorkar jongno? Ka dei ka sorkar Samajwadi. Mano ba dei u Myntri Rangbah ka Jylla? U Akhilesh Yadav u dei u Myntri Rangbah ka Jylla,” la ong u Owaisi.
U Owaisi u la kynthoh ïa ki seng pyrshah namar ba kim shym la lah ban pynpaw ïa ki mat jong ki jaitbynriew rit paid bad kiwei kiwei ki bynta kiba kham tlot ha ka imlang sahlang.
U la kynnoh ruh ba ki mosque ki la shah pynpra bad “ki jingïakynduh shiteng” ki dang bteng ha ka jylla hapoh ka sorkar ba la ïalam da ka BJP, hynrei ki seng pyrshah ki la “sngap jar” bad kim shym la pynpaw ïa katei ka mat.
Ha kaba sdang jong une u bnai, U Owaisi, u la tyrwa ban ïatreilang bad ka Samajwadi Party, na ka bynta ban khanglad ïa ka BJP, ba kan wanphai biang ha ka bor synshar ha Uttar Pradesh, ha ka sien kaba lai sien lynter.
Da ka jingbym don kano kano ka jingkiew ha ka liang ka jingïateh lok, la iohi ba u Owaisi u la nang kynthoh shuh shuh ïa ka seng Akhilesh Yadav.
