New Delhi, Risaw:
Katkum ki khubor, la ong ba ka jingïakynad hapdeng ka bor synshar jong ka Jamia Millia Islamia University bad ki samla pule kiba ïakhih pyrshah ka dang ïai bteng, wat haba ka skulbah ka la pynmih ïa ka “jingmaham ba khatduh” kaba bthah ïa ki samla pule ba kin pynlait mardor ïa ka Gulistan-e-Ghalib Building bad ka Ghalib Lawn hapoh u pud- u sam jongka.
La ong ba katei ka skulbah ka la maham ba kan pynshitom katkum ki kyndon aiñ lada ki samla pule kim kohnguh ïa katei ka hukum. Ka la pynbna ruh ba ki jinghikai na ka bynta baroh ki Course yn pynlong online tad haduh ban da pynmih da kawei pat ka jingpynbna.
Ki samla pule ki la pynlong ïa ka jingïakhih ha kine ki 16 sngi ba la dep, da kaba dawa ban pynïoh biang ïa ka seng ki samla pule bad ban pynlong ïa ka elekshon seng, kaba ki la ong ba kam shym la pynlong naduh u snem 2006.
Kane ka hukum kaba khatduh ka wan hapdeng ka jingïakynad halor ka jingïateh kular ba la pynbna da ki bor pynïaid jong ka skulbah hadien ka jingïakren bad ki samla pule kiba ïakhih. Katba kawei ka bynta jong ki samla pule ha kaba sdang ka la pynsangeh noh ïa ka jingïakhih, kawei pat ka kynhun ka la kyntait ïa katei ka jingpynbna, da kaba kynthoh ba ka skulbah kam shym la ai por kaba thikna ban mynjur ïa ka riti synshar jong ka seng samla pule bad ban pynlong ïa ka elekshon.
