Jowai, Risaw 28
Da ka jingthmu ban kyntiew ïa ka mynsiem ïaleh-kai bad pynkhlaiñ ïa ka jingïatylli hapdeng ki pulit, ka Futsal Committee jong ka West Jaiñtia Hills District Police ka la pynlong ïa ka Inter-Unit Futsal Tournament 2026 halor ka phang “Help Us to Help You”.
Ïa kane lympung la plie pyrda da u Bah Jason Mairom, Additional Supe-rintendent of Police, ha ka jingdonlang ka Kong C.W. Lyngdoh, Additional Superin-tendent of Police (DSB).
Haba kren ha kane ka jingïalang plie, u Bah Jason ula ïaroh ïa ka komiti kaba shim ïa ka sien jam ban pynlong ïa kane ka lympung. U la ai khublei ruh ïa u Superintendent of Police, u Jagpal Singh Dhanoa (IPS), na ka bynta ka jingkyrshan jong u, bad ïa ki ophisar bad ki pulit na ki unit bapher bapher kiba la wan ïashim bynta. U la kyntu ïa ki kynhun ban ïalehkai da ka mynsiem shitrhem bad ban ai ïa kaba bha tam.
Katba ka Kong Lyng-doh ka la ong ba jingïa-lehkai ka long ka bynta kaba kongsan, ka ïarap ïa ki pulit ban pynduna ïa ka jingban khia ha ka met bad ka jingmut jingpyrkhat kaba mih na ki kam ba man ka sngi. Ka la ong ba kum kine ki lympung ïalehkai ki ailad ïa ki pulit ban pynjahthait ïa ka met bad ha ka juh ka por pynkhlaiñ ïa ka jingïatreilang bad ka jinglong ryntih.
Ha kane ka sngi la pynlong ïa ka jingïalehkai phutbol paralok hapdeng ka Jowai Women Police Station bad ka Jowai Women Traffic, ha kaba ka Jowai Women Police Station ka la long ka nongjop.
Haba phai sha ka jing-ïalehkai jong kane ka sngi sdang, ka Jowai Traffic B ka la pynliem ïa ka Um-mulong BH da 2-1 kol.
La wan ïashim bynta haduh 16 tylli ki kynhun kynthup ïa ka Amlarem PS, Dawki PS, Jowai PS, Jowai Traffic A, Jowai Traffic B, Police Reserve A, Police Reserve B, Nartiang PS A, Nartiang PS B, Raliang PS, Phramer TC A, Phramer TC B, Ummulong BH, Barato OP, SP Office bad District Special Team.
Ïa ki jingïalehkai yn pynlong ha ki sngi trei katkum ka prokram bad ka jinglait jong ka madan.
