Lucknow, Risaw:
U Myntri Rangbah ka Punjab, u Bhagwant Mann, ha ka sngi nyngkong, ula pynbna ba ka sorkar kan pynlut haduh T.17.72 klur na ka bynta ban pynbha bad pynitynnad ïa ka Bhagwan Valmiki Tirath Sthal ha Amritsar.
Haba kren ha kawei na ki jingïalang ban rakhe ïa ka Parkash Utsav jong u Maharishi Valmiki, u Mann u la ong ba ka sorkar ka dang pynbha ïa ki jingdonkam ha katei ka jaka mane blei kaba pawnam kaba dang pynneh pynsah ïa ka jinglong kyntang jong ka niam bad ka jinglong tynrai jong ka.
Ha ka jingshim bynta ha ka jingrakhe ïa ka Parkash Utsav u Myntri rangbah u la shim bynta ban dem bad ainguh ha katei ka jaka mane blei bad ai khublei ïa ki paidbah riewngeit.
U la ong ba ki jinghikai jong u Maharishi Valmiki ki iai bteng ban ialam ïa ka imlang sahlang sha ka jingïaryngkat, ka jinglong briew bad ka hok.
U Mann u la ong ba ka jingtrei kaba dang ïaid shakhmat ha Bhagwan Valmiki Tirath Sthal ka long ban pynbha ïa ka jingwan ai jingshakri jong ki nongmane bad ban pynneh pynsah ïa ka jinglong tynrai jong kane ka jaka.
U Myntri Rangbah ka jylla u la batai ïa u Maha rishi Valmiki kum u Adi Kavi bad ong ba ka Ramayana ka iai bteng ban ai mynsiem ïa ki briew ha ki pateng bynriew.
“Ka epik immortal Ramayana ba la thaw da u Maharishi Valmiki Ji ka la pynshai ïa ka lynti jong ka hok na ka bynta ka longbriew manbriew da ki hajar snem,” u la ong da kaba bynrap ba ka epik ka pynsngew ïa ka khubor jong ka jingjop jong ka jingbha halor ka jingsniew bad kyntiew ïa ka jingshisha, ka jingsngewrit bad ka jinglong kaba don akor.
U Mann u la ong ba ki jinghikai jong u Maharishi Valmiki kim dei tang ha kano kano ka jaitbynriew ne ka por hynrei ki dei jong baroh ki jaitbynriew bad ula ai ruh ki jinghikai kiba long ruh ka jingkyrkhu na ka bynta kito kiba ngeit bad kiba bud ïa ka.
Haba pynksan ïa ka bynta jong ki jaka niam, u Mann u la ong ba ki dei ban dang sngur ha ki riti dustur ba kynja mynsiem jong ki bad ban shah pyniaid ha ki briew kiba ïadei bad ki jingngeit bapher bapher.
