New Delhi, Risaw:
17 ngut ki koidi kiba la shah set ha Theni sub-jail ha Tamil Nadu ki la lait phet ha ka miet jong ka sngi Nyngkong hadien ba la kynnoh ba ki la thombor ïa uwei u heh pulit, la ïathuh ki heh sorkar. La ïoh kem ïa uwei na ki 17 ngut ki koidi, katba la thaw 17 tylli ki kynhun ba kyrpang ban wad bad kem ïa ki koidi ba dang sah kiba la phet krad. U Inspector General of Police (IGP) jong ka South Zone u Vijayendra Bidari u la iathuh ba ïa uwei u koidi ba la lait phet la ïoh ban kem ha ka por ka jingthwet kaba jur da ki pulit.
Ki kynhun pahara ki dang pynlong ïa ka jingpeit bniah ïa ki kali hadien katei ka jingjia. U Superintendent of Police jong ka Dindigul u S Jeyakumar u la pynthikna sha ka ANI ba la buh ïa ki jaka talasi ha ki 16 tylli ki jaka ha ka district ba marjan jong ka Dindigul kum ka lad jingïada. Katkum ka jingïathuh jong ki pulit, baroh kitei 17 ngut la set ha kajuh ka patok. La kynnoh ba ki la thombor ïa u nongtrei ha patok haba u la wan rung ha along hadien ba la ïoh jingtip ba uwei na ki koidi u shitom, shwa ba kin phet krad na phatok.
Ha kane ka jingjia, la ong ba uwei u nongtrei jong ka tnat Gr. II Police, u Thangapandi, u la mynsaw na ki bynta jong ka khlieh bad la pynkit noh ïa u sha ka hospital sorkar kaba don ha G Vilakku. Arngut kiwei pat ki nongtrei ki la mynsaw malu mala, katkum ka kaiphod jong ki pulit. Hadien katei ka jingphet krad, ïa ki pulit ha ki district kiba marjan la pyntip bad la buh ha ka jingpeitngor bha. Ia ki jingïoh jingtip halor katei ka jingjia la ïasam sha ki pulit ha Idukki, Madurai bad Dindigul distrik, katba ïa ki dur jong ki koidi ba la lait phet la pynsaphriang hapdeng ki heh pulit ban iarap ban ithuh ïa ki. La register ïa ka case bad ka jingtohkit kaba bniah ka dang ïaid shakhmat. Ki pulit ki dang bteng ïa ka jingpyrshang ban wad bad kem ïa ki koidi kiba dang sah kiba la phet krad.
