Kolkata, Naitung:
Ha ka por ba dang ïai bteng ki kynrum kynram hapoh ka seng Trinamool Congress (TMC), ka Mamata Banerjee, kaba hakhliehduh jong ka seng, ka la shimti thikna ïa ka kam kum ka President jong ka seng jong ka West Bengal unit. Katei ka sienjam, ka long hadien ba ka Chandrima Bhattacharya, heh nongïalam ka seng, ka la iehnoh ïa baroh ki kam jong ka seng, tang katto katne taïew, hadien ba la thung ïa ka kum ka president jong ka jylla, hadien ba la mih bun ki jingphet seng bad ka jingbym ïasngewthuh jingmut hapoh ka seng.
Haba kren sha ki nongbud jong ka seng, ka Banerjee ka la ther tyngeh ïa ka kynhun pyrshah seng bad kynnoh ba ki leh na ka bynta ka jingmyntoi jong ka BJP. Ka la tynjuh ïa ki nongïalam pyrshah seng ban ïasoh pyrshah bad ka BJP ha ka jaka ban pynmih ïa ka jingkulmar hapoh ka seng.
Haba ban jur ïa ka jingdonkam jong ka jingïatylli, ka Banerjee ka la ong ba ka TMC kan ïai bteng ban ïakhun lang wat hapdeng ki jingshah pynthut ha ka saiñ pyrthei dang shen bad ki jingpyrshang ban pyntlot ïa ka seng.
Ka jingkylla nongïalam ka wan ha ka por kaba kongsan bha ïa ka TMC namar ba ka ïakynduh ïa kawei na ki jingeh kaba khraw tam hapoh jong ka ha kine ki snem ba la dep. Katto katne ngut ki nongïalam ki la pynjngai ïalade na ka seng, kaba la pynlong ïa ka jingïaleh bor halor ka rukom pynïaid jong ka seng.
Ka rai jong ka Banerjee ban ïalam hi dalade ïa ka kynhun seng ha ka jylla la shim ba ka dei ka jingpyrshang ban pynkhlaiñ ïa ka seng bad ban pynïoh biang ïa ka jingshaniah hapdeng ki nongbud jong ka.
Ka jingïakynduh jingeh jong ka Banerjee, ka la long na ka jingiehnohkam na baroh ki post jong ka president jong ka seng, ha West Bengal, ka Chandrima Bhattacharya, ha ka sngi Saitjaiñ.
Ka Bhattacharya ka la shah thung kum ka president ka jylla hadien ba ka la shah rem ha ka elekshon sha ka ïingdorbar thawaiñ ka jylla. Ka la mih bujli ha ka jaka jong ka Subrata Bakshi kum ka President ka jylla hadien ba ka Mamata Banerjee ka la pynkhyllem lut ïa baroh ki komiti jong ka seng bad pynbeit thymmai ïa ka seng ha ka 3 tarik u, Jylliew, hadien ka jingshah rem ha ka elekshon pyrshah ïa ka BJP.
“Da kane nga tender ïa ka jingiehnoh kam jong nga na ka kam State President jong ka All India Trinamool Congress, kaba la pynkup ha nga ha ka jingïalang ha Kalighat ha ka 03.06.2025. Nga iehnoh ruh ïa baroh kiwei pat ki kam kiba nga bat mynta,” ka la ong ha ka shithi iehnoh kam jong ka.
“Sngewbha kynmaw ba nga weng noh ïalade kum ka nongsoi ba la ai bor jong ka All India Trinamool Congress bad baroh kiwei kiwei ki seng kiba ïadei bad kane ha kaba ïadei bad ki jingkheiñ jingdiah ba la buh ha ki bank bapher bapher. Nga weng noh ruh ïalade na ka jinglong briew ba la ai bor jong phi hakhmat ka Election Commission of India,” ka la bynrap.
Ka la pynkut ïa katei ka shithi da kaba ong ba kan don beit ka jingburom kaba khraw tam ïa ka Mamata Banerjee.
Ym slem hadien ba ka la phah ïa ka jingthoh iehnoh kam, ka Chandrima Battacharya ka la ïakynduh ïa ka kynhun pyrshah seng ba la ïalam da ka Ritabrata Banerjee ha ka ïingdorbar Bengal. Lah ban kdew hangne ba ka Ritabrata Banerjee ka la shah thung kum ka Nongïalam ka Liang Pyrshah ha Assembly namar kiba bun ki MLA ki kyrshan watla ka Mamata Banerjee ka la pynieng ïa u MLA ba rangbah jong ka TMC u Sobhandeb Chattopadhyay na ka bynta katei ka shuki.
U MLA jong ka kynhun ka Mamata Banerjee, u Kunal Ghosh, ha ka jingkynthoh kaba tyngeh halor ka jingiehnohkam jong ka Chandrima Bhattacharya, u la kylli balei ba kam shym la iehnoh “haba ka sngewtynnad ïa ki kam ba la ai da ka Mamata Banerjee ha ka por ba synshar ka sorkar jong ka”.
Ka Chandrima Bhattacharya ka dei ka Myntri barim jong ka West Bengal bad la slem bha la ñiew ïa ka kum kawei na ki nongïarap ba jan eh jong ka Mamata.
Haba kynthoh halor ka jingmih noh kaba dang shen na ka seng Trinamool, u President ka BJP ka jylla u Samik Bhattacharya u la ong ba ki paidbah jong ka Bengal kim don jingsngewtynnat shuh ïa ka seng jong ka Mamata Banerjee. “Kam pher shuh sha kano ka liang ka TMC ka leit bad kano ka kynhun kan shimti ïa ka bor jong ka seng. Ki briew ki tip ba ka TMC ka la duh noh ïa ka jinglong jingman jong ka ha ka saiñ pyrthei,” u la ong.
Ka Trinamool Congress ka mad ïa ka jingeh ha ka jinglong jingman namar ba ka la shah ktah ha ka jingïakhih kaba phylla hapoh ki kynhun jong ka naduh ka jingshah rem ha ka elekshon dorbar thawaiñ. Katba ka jingbun paid jong ki 80 ngut ki MLA jong ka, ki la bret noh bad thaw ïa ka kynhun ba kyrpang ba la ïalam da ka Ritabrata Banerjee, 20 ngut ki MP jong ka party ruh ki la ïakhih bad pynbna ba ki kyrshan ïa ka NDA hadien ba ki la ïasoh bad kawei ka seng ka bym pat paw bha, ka NCPI.
Ka jingiehnohkam jong ka Bhattacharya ka la jia shisngi hadien ba la don ka jingïakynad kaba jur bha ha ka ophis jong ka Trinamool ha Kolkata ha kaba ki kynhun kiba ïaleh pyrshah ki ïakhun ban synshar ïa katei ka jingtei.
Ka jingïakynad kaba jur bha ha ka saiñ hima sima, ka la mih ha ka sngi Thohdieng, hadien ba ka kynhun pyrshah seng, ka la ïoh ban synshar ïa ka jaka treikam jong ka seng, ka Trinamool Bhavan, ha Kolkata. Ki nongpyrshah ki la pynkylla ïa ki jingkhang, ki la buh ïa ka jingthoh ba la buh ïa u Arup Roy kum u Chairman jong ka seng, bad ki la kam ba u dei u “Real TMC” ha khmat ka Election Commission.
Kum ka jingkynthoh, ki nongmihkhmat kiba ïaineh ïa ka Mamata Banerjee ruh ki la hiar sha Trinamool Bhavan bad ki la ujor sha ki pulit pyrshah ïa kane ka jingshimti, kaba la pynlong ïa ki pulit CRPF bad ki pulit Kolkata ban pynkhlaiñ ïa ka jingpyntreikam ha kylleng ki jaka.
