Patna, Naitung:
Ka kynhun National Investigation Agency (NIA) ha ka sngi Ba-ar ka la pynlong ïa ki jingkhynra ha kajuh ka por ha ki distrik Gopalganj jong ka Bihar, East Champaran bad Saran kum shi bynta ban tohkit halor ka jingkynnoh ba ka donkti ha ka jingkhaïi briew shabar ri ha kaba la donkti ban phah ïa ki briew sha Cambodia na ka bynta ka kam thok lyngba ka Cyber.
Ki kynhun NIA ki la tohkit ïa ki katto katne ngut ki briew, ki la kurup ïa ki mobile phone bad ki tiar digital, bad ki la khot ïa kitei ki runar sha ka ophis treikam jong ka ha Patna ban tohkit bniah shuh shuh.
Ha Gopalganj, ka kynhun jong ka NIA ka la tohkit ïa uwei u agent uba la tip kyrteng kum u Pradeep Singh ha ka thaiï Sadhu Chowk kaba don hapoh ka jingkhmih jong ki pulit ka Town Police Station. Kane ka jingtohkit, ka don jingïadei bad ka mukotduma, ha kaba u Satyanarayan, uba dei u nongshong shnong jong ka Bettiah ha West Champaran distrik, u la shah kynnoh ba u shah phah shabar ri ha u snem 2024 bad hadien la rah ïa u sha Cambodia, ha kaba u la shah pynbor ban leh ïa ki kam thok lyngba ka Cyber.
Ki tyllong khubor ki ïathuh ba u Satyanarayan u la ïoh ban lait na ki kti jong ki runar ba treikam ha ki Cyber bad u la wan phai biang sha India, hadien kane u la ujor sha ka kynhun NIA. Ka tnad ka dang tohkit ïa kane ka mukotduma katkum ka jingujor.
Hadien ba la kylli jingkylli, ka NIA ka la pynmih ïa ka jingpynbna kaba bthah ïa u Pradeep Singh ban leit mih ha ophis treikam jong ka ha Patna ha ka 10 tarik, Naitung. Ha kaba ïadei bad kane, u Singh u la kyntait halor ka jingkynnoh, bad pynshisha ba ïa baroh ka pisa la dep ban siew biang sha une u briew uba la wanphai na Cambodia bad ba ka NIA ka la sdang ïa ka jingtohkit jong ka tang hadien ba la buh biang ïa ka jingmudui.
Ha East Champaran, ka kynhun NIA ka la leit ban khynra ïa ka ïing sah jong u Mohammad Kalamuddin ha ka shnong Kalupakar kaba hap hapoh ka jingkhmih jong ki pulit ka Phenhara. Katkum ka jingong jong kane ka tnad, la ong ba ka kyrteng jong u Kalamuddin ka la paw ha ka por ba tohkit ïa ka kam khaïi briew sha bar ri. La kurup ïa ka mobile phone jong u bad la tohkit ïa u da kumba katto katne kynta.
Ka kynhun NIA ka suba jur ba u Kalamuddin u dei shi bynta jong ka kynhun kaba donkti ha kaba phah briew sha Cambodia bad pynbeit ïa ki tiket leit jingleit. Ha ka jingtohkit, la lap ruh ba u la ïakynduh bad u Sudhir Singh, uba dei u nongshong shnong jong ka Chhapra, uba la shim ba u dei u nongshah kynnoh ba kongsan ha katei ka kam. La bthah ïa u Kalamuddin, ba un leit hajir ha ophis jong ka kynhun NIA ha Patna, ha ka 13 tarik, Naitung.
Ha Saran distrik, ka kynhun ba kyrpang jong ka NIA na Delhi, ba la ïarap da ki pulit ka thaiñ, ki la pynlong ïa ka jingkhynra ha ka shnong Pachrukhwa kaba hap hapoh ka jingkhmih jong ki pulit ka Mashrakh ha ka por kumba 5 baje mynstep jong ka sngi Ba-ar. U DIG u Saran Nilesh Kumar u la pynthikna ïa kane ka jingkhynra bad u la ong ba ki pulit ka thaiñ ki la ïatreilang bad ka kynhun NIA ha ka por ba ki la don bynta ha ka jingkhynra.
