UN, Risaw:
U heh jong ka IAEA, u Rafael Grossi, u la kyntu ïa ka Iran, ha ka jingialang jong ka UN Security Council, ha ka Sngi Ba-ar, ba kan ailad mardor ïa ka tnat treikam jong u, khnang ba kan lah ban pynshisha ïa ki tiar nuclear jong ka ri Islam.
Ka International Atomic Energy Agency (IAEA) kam shym la ioh lad ban ioh ïa ki jaka pynmih nuclear ba kongsan ha Iran naduh ba ka Israel, kaba la iasoh bad ka America, ka la sdang ïa ka jingialeh kaba 12 sngi ha u Jylliew 2025 kaba kynthup ïa ki jinghiar thma ha ki jaka pynmih nuclear.
Ki jaka shna nuclear ruh ki la shah ktah ha ka thma ba khatduh, kaba la khie ha ka 28 tarik u Rymphang, bad ka IAEA ka la khot bunsien ban ioh rung.
“Nga khot sngewbha ïa ka Iran ban iatreilang bad ka IAEA khlem kano kano ka jingpynslem shuh ban pynshai ïa ki jingkylli kiba dang sahteng shaphang ki jingiada bad ban ai ïa ka IAEA ïa ki jingtip bad ka lad kaba ka tnat ka donkam, khnang ba kan lah ban pynshisha ïa baroh ki jingdonkam bad ki tiar kiba iadei, kumba ka long ka jingkitkhlieh ain jong ka Iran,” la ong u Grossi.
Ka jingialang jong ka dorbar pahara ka long hadien ka rai ba la mynjur da ka IAEA board ha u bnai ba la dep kaba la phah ïa ka Iran sha ka kynhun ba ha khlieh duh jong ka UN halor ka jingbym kohnguh jong ka ïa ki tiar nuclear.
Kane ka rai, kaba la aiti da ka Britain, France, Germany bad ka America, ka dei ka sien kaba nyngkong, ba ka Iran, ka shah phah sha ka Security Council, ha ki 20 snem, namar ba kam shym la pyndep ïa ki jingkitkhlieh jongka, ha kaba iadei bad ki nuclear.
Ïa kane ka jingleh la ïohi kum ka dak kaba khraw namar ba ka China bad ka Russia ki bat ïa ka bor ban weto ïa kino kino ki jingpynjari pyrshah ïa ka Tehran, ka paralok jong ki. Baroh ar tylli ki ri ki la iadon lang bad ka Niger ban thep vote pyrshah ïa ka rai jong ka IAEA.
U nongmihkhmat jong ka UN jong ka Iran, U Amir Saeid Iravani, u la pyrta ïa ka “sngap jar” jong ka Security Council, ha kaba ïadei bad ki jinghiar thma jong ka US bad ka Israel, pyrshah ïa ka ri jong u.
