Bengaluru, Naitung:
Shi sngi hadien ba ki nongïalam jong ka National Democratic Alliance (NDA) ki la aiti ïa ka jingthoh sha u heh ophisar jong ka jylla Karnataka ha Bengaluru da kaba kynnoh ïa ki jingbym ïahap ha ka jingpynkylla kyrpang ïa ki thup kyrteng jong ki nongthep vote ha ka jylla, ki nongïalam jong ka National Democratic Alliance (NDA) ki la kyntu ïa u Chief Election Commissioner u Gyanesh Kumar ban pynsangeh noh mardor ïa ka hukum ba dang ïaid shakhmat ha ka jylla bad hukum ba la dei ban pynlong biang da ka jingkhmih bniah katkum ki phom jingkheiñ briew lyngba ka jingleit rung ha man ki thliew ïing da ki Booth Level Officers (BLOs).
Kane ka kynhun ba la ïalam da ki Myntri ka sorkar pdeng u HD Kumaraswamy, u Pralhad Joshi, u V Somanna bad u Shobha Karandlaje ryngkat ki nongïalam ka liang pyrshah ha Karnataka bad ka Legislative Assembly bad ka Council, u R Ashoka bad u Chalavadi Narayaswamy, bad kiwei pat, ki la leit ïakynduh ïa u Chief Election Commissioner ha New Delhi.
Ki la dawa ba dei ban thung ïa ki nongkhmih bniah na kiwei pat ki jylla ban peit ïa ka jingleh SIR haman la ki distrik ban pynthikna ba kan long ha ka rukom kaba hok, kaba shai, bad kaba khlem shah liang.
Shuh shuh, ki la dawa ban pynshitom da kaba tyngeh ïa ki heh bad ki nongtrei saiñ pyrthei kiba la lap ba ki donkti ha kaba pynkheiñ ïa ki rukom treikam ba la buh ne pynsuk ïa ki jingbym pynïaid beit ïaid ryntih kumba la kynnoh.
Ha ka dorkhas kaba ki la aiti, ki nongïalam ka NDA ki la ong ba ki heh kiba la aiti ïa ka kam ban pynïaid ïa ka SIR ki pyni ïa ka jingbym kheiñ snep ïa ka rukom treikam ba la mynjur, da kaba pynduhjait ïa ka mynsiem jong ka synshar paidbah hi.
Hapoh ki jingbthah jong ka SIR, ki BLO hapoh ki jingbthah jong u District Election Officer ki dei ban pynlong ïa ka jingpynshisha kaba donkam na kawei ka thliew ïing sha kawei pat na ka bynta ka jingpynshisha bad ka jingithuh ïa ki dkhot jong kawei pa kawei ka longïing, ki la ong.
“Hynrei ïa kane ym shym la bud kumba dei ban long, ïa ki sakhi jong kane la sam ha ki Social Media, katba ki lad pathai khubor ba pawnam ruh ki la rah katto katne kum kine ki jingjia, baroh ki long kiba shai ha ki jaka paidbha,” la thoh ha ka dorkhas.
Ki la kynnoh ba la pyndap ïa ki phorm jingkheiñ briew ha ki jaka ïakynduh paidbah, ki mosque, bad ki jaka sah jong ki BLO.
“La thaw ruh ïa ki kynhun WhatsApp na ka bynta kajuh ka jingthmu, bad la pynshlur ïa ki briew ban leit jngoh ïa kine ki jingïalang paidbah bad ki mosque na ka bynta ka SIR. Kum kane ka rukom ka long ka jingpynkheiñ ïa ki kyndon jong ka SIR ba la buh bad ka pynmih ïa ki jingsngewkhia kiba jur ha kaba ïadei bad ka jinglong pdeng jong ka rukom jied nongmihkhmat,” la ong ka dorkhas.
“Ki BLO kim pyntip sha ki BLA shaphang ka rukom pynshisha bad ki kam kiba ïadei bad kane, da kaba pynduna ïa ka jingshai. Ha ki katto katne ki khep, ïa ki briew kiba don tang ïa ka kyrteng kur ba ïadei lang la kheiñ kum ki dkhot jong kajuh ka longïing khlem ka jingpynshisha kaba biang, kaba lah ban wanrah ïa ki jingbakla kiba khraw ha ka thup kyrteng thep vote,” la bynrap shuh shuh ka dorkhas.
Ki la kynnoh ruh ba ïa ka jingpynshisha kaba la bthah da ka Election Commission of India, kaba la bthah ban leit jngoh lai sien na ka bynta ki jingpynshisha, ym shym la bud ryntih ha Karnataka kumba la bthah.
Ki la kynnoh ba haduh 72% na katei ka jingpyntreikam la pyndep hapoh hynriew sngi naduh ba la sdang ïa ka ha ka 30 tarik u Jylliew, kaba la pynmih ïa ka jingartatien halor ka jingbud ryntih ïa ki kyndon jong ka ECI.
Ki la kynnoh ruh ba ki BLO na kawei ka niam ki shah pyntreikam ha ki jaka ba don ki rit paid, kaba la pynmih ïa ka jingsngewkhia halor ka jinglong hok bad jinglaitluid ha ka jingpyntreikam.
