Khliehriat, Risaw 28
Ka Musniang SC bad Khliehriat West YWSC ki la jam sha ka semi-final ha ka 1st Division Football League (Thomas Nongtdu Memorial Trophy) ba la pynïaid da ka East Jaiñtia Hills District Football Association.
Ha ka jingïakhun quarter final kaba la long ha ka sngi Balang ha madan Diengshynrum ha Khliehriat, ka Musniang SC ka la pynliem ïa ka Ladrymbai Dongwah SWSC da 1-0 kol, bad ïa kane la thep da u Jespar Lamare ha ka minit kaba 56.
Ha kawei pat ka jingïalehkai quarter final, ka Khliehriat West YWSC ka la jop da 1-0 kol ïa ka Deinshalalu SC. Ïa kane ka shi kol la thep da u Bijoy Suting ha ka minit kaba 38.
Ïa ka nam Player of the Match la khur da u Dawan Malang jong ka Musniang SC bad Bijoy Suting jong ka Khliehriat West.
Ka jingïalehkai semi final kan long ha ka 31 tarik mynta u bnai hapdeng ka Khliehriat East YWSC pyrshah ïa ka Rymbai Synrang Sha h-khain SC ha ka por 2 baje nohphai sngi. Katba kawei pat ka jingïakhun semi-final kaba ar kan long ha ka 2 tarik u Naiwieng hapdeng ka Musniang SC pyrshah ïa ka Khliehriat West ha ka por 2 baje nohphai sngi.
