Itanagar, Naitung:
Ka Inter-Ministeral Central Team (IMCT) ha ka sngi Balang, ka la leit jngoh ïa Keyi Panyor distrik jong ka Arunachal Pradesh kaba la shah ktah bha ha ka jingshlei um ban bishar bniah ïa ka jingjulor bad ban bishar bniah ïa ka jingdonkam ban ïoh jingïarap shuh shuh na ka sorkar pdeng, la ïathuh ki heh sorkar.
Ïa kane ka kynhun ba la ïalam da u Joint Secretary jong ka Ministry of Home Affairs u Nishtha Tiwari la synran lang da u Disaster Management Secretary ka jylla u Dani Salu ha kane ka jingleit jngoh, ki la ong.
Ka kynhun ka la leit na ka nongbah jong ka jylla Itanagar sha ka distrik da ka surok, da kaba jurip ïa ki jaka ba la shah ktah ha ka jingtwa khyndew bad ki jingtwa surok ha shilynter ka lynti kiba la pynthut ïa ka jingpynïasoh ha ka thaiñ, ki la bynrap.
Hadien kane ka kynhun ka la leit jngoh ïa ki jaka ba la shah ktah jur bha, kynthup ïa ka Posa NEEPCO Colony bad ka shnong Possa, ban shim jingkheiñ ïa ka jingpynjot kaba la wanrah da ka jingshlei um.
Ka jinghap biang jong u slap ka la wanrah sa shisien ïa ki jingshlei um bad ki jingtwa khyndew ha kiba bun ki bynta jong ka Arunachal Pradesh, kaba la ktah ïa ki hajar ngut ki briew bad wanrah ïa ka jingjulor kaba jur ïa ki jingtei bad ka rep ka riang, ong ka khubor jong ka State Emergency Operation Centre (SEOC).
Katkum ka kaiphod bathymmai jong ka SEOC ka la ïathuh ba ki la don palat 94,200 ngut ki briew ha kylleng ki 333 tylli ki shnong ha ki 237 tylli ki Circle kiba kynthup ïa ki 26 tylli ki district ki la shah ktah ha kane ka aïom slap kaba dang ïaid shakhmat.
Ka Upper Siang ka dang sah kum ka distrik kaba la shah ktah jur bha, bud sa ka Siang bad ka Kra Daadi.
Ha kine ki 24 kynta ba ladep, ka Changlang ka la don ka jinghap slap kaba jur, ka jingshlei um bad ka jingtwa khyndew, katba ka Upper Subansiri ka la don ar tylli ki jingshlei um bad lai tylli ki jingtwa khyndew.
Ka Upper Siang ka la sakhi haduh 16 tylli ki jingtwa khyndew, bad ka jingtwa ki maw kaba la mih na ka daw jong u slap ba khlem sangeh la ïathuh ka khubor ba la wan na East Kameng.
Ka jinghap slap ka la shim ïa ka jingim jong saw ngut ki briew ha ka jylla haduh mynta. Lah ban kdew ba uwei u briew u la khlad noh ha ka jingtwa khyndew ha ka shnong Sarti ha ka Elaka Anjaw ha ka 28 tarik, Jylliew, katba lai ngut kiwei pat ki la duh noh ïa la ka jong ka jingim ha ka jingshlei um kaba la lynshop ïa ka shnong Possa ha Keyi Panyor distrik.
Kane ka jingjia ka la pynmynsaw ruh ïa 21 ngut kiwei pat, katba arngut ki kynthei ki dang jah rngai.
Ki bor pynïaid ki la ïathuh ba ki kam pynlait im bad ai jingïarap ki dang ïaid shakhmat ha ki distrik kiba la shah ktah ha ryngkat ki kynhun na ka National Disaster Response Force (NDRF), State Disaster Response Force (SDRF), ki shipai ka tnat Army, ki shipai ka Air Force bad kiwei pat ki kynhun treikam ha kum kane ka bynta.
Ka jingshlei um bad ka jingtwa khyndew ka la ktah jur ïa ka rep ka riang bad ki jingtei paidbah.
Kumba 334.2 hektar ka jaka rep ka la shah pynjulor, kynthup 185.5 hektar ka jaka rep soh, syntiew, jhur bad kiwei bad 148.7 hektar ka jaka rep jaka riang kum ki lyngkha, katba jan 1,010 hektar ka jaka khlaw ruh ka la shah ktah.
Ka kaiphod jong ka SEOC ka la buh jingthoh ruh ïa ka jingjulor kaba jur ïa ki jingtei paidbah, kynthup ïa 131 tylli ki surok, 19 tylli ki jingkieng, 21 tylli ki nala um, 191 tylli ki jaka pynpoi um, 58 tylli ki ïing sorkar, 21 tylli ki laiñ bording, 224 tylli ki nar pynïeng sainar elektrik, saw tylli ki projek hydel, hynñiew tylli ki kynroh ïada na ka jingshlei um bad ar tylli ki hospital bad lai tylli ki skul. Da ki spah tylli ki ïing ki la shah pynjulor ruh ha ki bynta bapher bapher jong ka jylla.
Ar tylli ki jaka sah shipor la pyntreikam ha Keyi Panyor distrik, ha kaba 252 ngut ki briew kiba la shah pynkynriah jaka ki dang pynlong jaka rieh tngen ha kine ki jaka.
Ha kajuh ka por, ka Indian Meteorological Department (IMD) ka la maham ba ka jinghap slap, ka lah ban dang jur bha ha ka jylla Arunachal Pradesh, ha kine ki sngi ban wan.
Ka jinghap slap kaba jur haduh kaba jur bha ryngkat bad ka jingtied pyrthat bad ka leilieh la antad ba kan sa ktah ïa ka Lohit, Changlang bad Tirap distrik.
Kumjuh ruh la antad ha Lower Dibang Valley, Namsai bad Tirap kan don ka jingshah ktah jur.
Ka IMD ka la pynmih ruh ïa ka jingmaham ba jur slap ha Upper Subansiri, Lower Siang, Lower Dibang Valley, Namsai, Tirap bad Longding ha kane ka sng Thohdieng.
Katba ka jinglong ka suiñbneng kan nangbha suki suki naduh ka sngi Saitjaiñ, hynrei ka jinghap slap kaba jur ha ki jaka ba kyrpang ka dang lah ban don ha ki bynta ba shaphang Mihngi jong ka jylla.
