Guwahati, Naitung:
Ki bor pynïaid ka tnat ka koit ka khiah ha Dhubri distrik jong ka Assam, ki la pynlong ïa ka jingïalap ba jur bha ha ka koit ka khiah, kaba la neh shibnai, hadien ka jingkiew kaba shyrkhei jong ki nongpang HIV, Hepatitis-B bad Hepatitis-C, kaba ïadei bad ka jingnang pyndonkam ïa ki dawai injek ha ki samla.
Ka Assam State AIDS Control Society, ha ka jingïatreilang bad ka District Health Society, Dhubri, ka la sdang ïa ka jingïalap ïa ka koit ka khiah kaba la pynïasoh lang ha ka 8 tarik u Naitung ban ithuh ïa ki briew kiba ïoh ïa katei ka jingpang, ban tehlakam ïa ka jingsaphriang jong ki jingpang bad ban pynbha ïa ki samla kiba la shah ktah na ka jingdih buaid.
Kum shi bynta jong ka jingïalap, la pynlong ïa ka jingpeit bniah bad jingithuh ïa ki paidbah ha kylleng ka distrik, ha kaba ki ophisar ki thmu ban map ïa ki jaka ba don jingma, ban ai jingmut bad ban pynthikna ïa ka jingsumar ha ka por kaba biang lyngba ki jingshakri jong ka Antiretroviral Therapy (ART).
U Joint Director ka tnad ka Koit ka Khiah jog ka Dhubri, u Jyoti Kumar Das haba ïakren bad ki lad pathai khubor u la ïathuh ba ki bor pynïaid ka koit ka khiah ki la lap ïa ka jingdon kaba thikna bha jong ki nongdih drok kiba shu injek, kiba bun na kine ki dei kiba la ïoh ïa ka jingpang HIV, Hepatitis-B bad Hepatitis-C.
“Ngi la lap bun ki nongdih drok bad kiba injek drok ha ka distrik. Napdeng jong ki, katto katne ki dei kiba don ïa u khñiang HIV, katba kiwei pat ki la ïoh ïa ka jingpang Hepatitis-B bad Hepatitis-C. Ka jinglong jingman ka la kylla long ka mat kaba sngewkhia bha,” la ong u Das.
U la kdew ba bun na kito kiba shah ktah ki dei kiba hapdeng ka rta 16 bad 23 snem, kaba pynpaw ïa ka jingkiew jong ka jingbym ïoh jingïarap ki samla ha ka jingkyrni dih drok.
Katkum ka jingong u Das, ka jingsam ïa ki nar injek kiba la dep pyndonkam hapdeng ki nongdih drok ba lah ban injek ka pynsted ïa ka jingsaphriang jong ki jingpang ba saphriang, kaba pynmih ïa ka jingtieng ba ki jingpang ki lah ban saphriang shuh shuh lada ym shimkhia mardor.
U la ong ba kane ka jingïalap kan kynthup ïa ka jinglum ïa ki jingtip ba ïadei bad ki briew kiba shah ktah, ka jingbuddien ïa ka jinglong jingman jong ka koit ka khiah jong ki, ka jingai jingmut, bad ka jingpynïasoh ïa ki bad ki jaka sumar ban ïada na ka jingsaphriang shuh shuh.
Ki heh ka tnad ka koit ka khiah ki la pynpaw ka jingkyrmen ba kane ka jingïakhih ba la pynïasoh lang kan ïarap ban tehlakam ïa ka jingsaphriang jong ka jingpang HIV bad ka Viral Hepatitis katba kan pynshlur ïa ki samla kiba shaniah ha ki dawai pynbuaid ban wad jingsumar bad pynbha pat.
Ka bor synshar distrik ka la kyrpad ïa ki paidbah ban ïatreilang bad ki nongtrei ka koit ka khiah bad ban ïashim bynta ha ka prokram screening khnang ban ïarap ban tehlakam ïa ka jingeh kaba dang mih ha ka koit ka khiah paidbah.
