Kohima, Naitung:
Ki bor pahara ha ka sngi Ba-ar, ki la pynjur ïa ka jingkhynra ha Chumoukedima distrk jong ka Nagaland, shisngi hadien ka jingbthei jong ki bom Inprovised Explosive Device (IED) kaba la pynïap ïa uwei u shipai jong ka tnat Assam Rifles bad pynmynsaw saw ngut kiwei pat ki shipai bad uwei u riew paidbah.
Katkum ka jingïathuh jong u nongaiktien jong ka tnad ïada ri, la phah shuh ïa kiwei pat ki kynhun shipai jong ka Assam Rifles bad ki pulit jong ka Nagaland ha katei ka jaka ban wad ïa kiba donkti ha katei ka jingthombor, kaba la jia hajan Sukhovi ha ka lah sngi U Blei.
U shipai uba la khlad u dei uba la tip kyrteng kum u Havildar Mohd Iqbal jong ka 28 Assam Rifles, uba don ha ka Assam Rifles Training Centre and School kaba don ha Sukhovi. U dei u trai shnong na ka shnong Kallar Mohra kaba don ha Poonch distrik jong ka Jammu & Kashmir bad u la rung sha kane ka kynhun shipai ha u bnai Ïaïong jong u snem 2003. U la iehnoh shadien ïa ka kurim jong u, ka Nasim Akther.
Ki saw ngut ki shipai jong ka Assam Rifles kiba la mynsaw, la ïathuh ba ki don ha ka jingkoit jingkhiah, ong u nongaiktien ka tnat ïada ri.
Kane ka jingbthei bom ka dei ha ka por ba ki shipai jong ka Assam Rifles ki ïaid lyngba kawei ka mini truck. Uwei u riew paidbah uba ïeng hajan u la mynsaw na ka kjat hadien ba la sied ki lyngkhot na ka jingbthei bom, katba kawei ka Autorickshaw ka la julor bha.
Ha kajuh ka por, ka NSCN/GPRN (NSCN-IM) ka la pynrem jur ïa kane ka jingbthei bom, da kaba batai ba ka dei ka kam lehnoh kaba shyrkhei” kaba thmu ban pynthut ïa ka jingsuk ha kane ka thaiñ.
Ha ka jingpynbna, ka kynhun ka la ong ba ka jingpyndonkam ïa ki tiar pynbthei ba la shna kyrpang bad ki bom pynbthei ym lah ban pynshisha, da kaba maham ba kum kine ki jingshah thombor ki buh jingma ïa ka jingim jong ki riew paidbah, ki pynphriang ïa ka jingtieng hapdeng ki paidbah bad ki pynthut ïa ka jingsuk kaba ki briew jong ka thaiñ ki la wad ban pynneh pynsah.
Da kaba pynjngai ïalade na katei ka jingjia, ka NSCN-IM ka la ong ba kan wad ban pynthikna ïa ki jingshisha kiba don shadien jong katei ka jingbthei bad ban ithuh ïa kiba donkti.
Ka la kyntu ruh ïa ki paidbah ba kim dei ban shu pyrkhat lypa ïa katei ka jingjia bad ka la kyrpad ïa ka jingïatreilang ban pynthikna ba kito kiba don shadien jong katei ka jingshah thombor kin shah pynngat ha ka aiñ.
Haduh ba la thoh ïa ka khubor ym pat don kano kano ka kynhun lehnoh kaba la kam ba ka la donkti ha kane ka kam thombor.
