Aizawl, Naitung:
Ka jingtwa khyndew kaba jur kaba la mih na ka jinghap slap kaba khlem sangeh ka la rong noh ïa ar tylli ki ïing, kawei ka jaka bam harud surok bad kawei ka dukan ha ka distrik Lunglei jong ka Mizoram ha ka step jong ka sngi Ba-ar, watla ym shym la don kano kano ka jingmynsaw namar ba la pynkynriah lypa ïa ki nongshong shnong, la ïathuh ki heh sorkar.
Kane ka jingtwa khyndew, ka la lynshop ïa ka shnong Tawipui South, ha ka por kumba 5 baje mynstep, ha kaba ka la pynjot ïa ar tylli ki ïing kiba don ha shiliang jong ka surok.
Kane ka jingjia ka la pynthut ruh ïa ka leit ka wan jong ki kali ha ka National Highway-2, kaba pynïasoh ïa ka Lunglei bad Lawngtlai distrik.
Ki heh sorkar ki la ïathuh ba ka jaka ba shah ktah ka la sakhi ïa ki katto katne ki jingtwa khyndew kiba rit naduh ka 9 tarik u Naitung, kaba la pynlong ïa ki nongshong shnong ban pynkynriah ïa ki tiar jong ki sha ki jaka kiba kham shngaiñ ha ka lah sngi U Blei hadien ba la paw ki dak jong ka jingtwa khyndew kaba la jan.
La pynkynriah ruh ïa ki nongshong ha ki ïing kiba la shah ktah shwa ban twa, kaba la khanglad ïa kano kano ka jingduh mynsiem.
Ki jaboh jabaiñ na ka jingtwa khyndew kim pat lah ban pynkhuid namar ba ka tduh lum ka dang sahkut, ha kaba ka jingtwa khyndew kaba bteng ka buh jingma ïa ki kam pynbha pat, la ong ki heh sorkar.
Ka shnong Tawipui South kaba jngai kumba 45 km na Lunglei bad kumba 30 km na Lawngtlai ka la shah ktah na ka jingtwa khyndew, kaba la nang pynthut shuh shuh ïa ka jingpynïasoh sha Lawngtlai distrik.
Ka shnong Tawipui South kaba jngai kumba 45 km na Lunglei bad kumba 30 km na Lawngtlai ka la shah ktah na ka jingtwa khyndew, kaba la nang pynthut shuh shuh ïa ka jingpynïasoh sha Lawngtlai distrik.
Ka India Meteorological Department (IMD) ka la ïathuh lypa ba ka jinghap slap kan sa wan lang bad ka jingjur lyer bad kumjuh ka jingtied pyrthat ha kiba bun ki bynta jong ka Mizoram, kynthup ha ka nongbah Aizawl, kumba la sakhi naduh ka sngi Ba-ar bad ka ban bteng haduh ka sngi Palei, ha kaba kane ka buh jingma ba ka jingbteng jong ka jinghap slap kan sa nang ïai bteng ban wanrah ïa shibun ki jingjulor.
