Ka ri Khasi jongngi mynshuwa ka ioh ka nam ha ka burom bad ka akor. Namar mynshuwa ki dang burom ïa ki riew rangbah bad ki riew tymmen ha ka imlang ka sahlang. Naduh napoh ïing napoh sem ruh ki da ñiewkor bha ïa kiba la rangbah. Haba ong eiei ki rangbah kim ju kham kyntait ki kohnguh khamtam ki khynnah samla bad ki khynnah ba dang kham rit.
Hynrei mynta ka la hiar ka akor ka burom, namar ki khynnah mynta kim salia shuh ban sngap ïa ka jingsneng bad jingbthah ki riew tymmen. Ki saitlah bad ki ong pynban wat ka kmie ba kha ruh kam lah ban ai hukum eiei ïa ki, namar kim ngeit shuh wat ïa ka jingsneng ki kmie ki kpa ruh. Ka juk ka la kylla kam don shuh ka jingïa-ieit markylliang para briew. Tip ha kaei ka daw ba ka wan kane ka rukom bym burom shuh khamtam ïa kiba la heh la san.
ïa ki kmie ki kpa ruh kim burom shuh. Kumno kein kin burom ïa ki briew watla ki long ki rangbah briew ruh. Mynshuwa te haba ki ïakynduh ïa ki riew rangbah ki da burom ha lynti ha syngkien ruh.
Mynta te kim pet shuh wat tang ka khmat ruh, ban pynrit hakhmat ki rangbah. Mynta imat ki la long sawkuna lut baroh. Kim kwah shuh ban pynrit hano hano ruh.
Haba ïa ka kmie u kpa ruh kim kohnguh shuh. Ka jingong na ka Bible kaba ong to burom ïa ka kmie bad u kpa ka long tang kumba bret ïa u mawlynnai ha khmat ki sniang. Namar ka akor ka burom ka la hiar ha ka imlang ka sahlang.
C. B. Iawphniaw
